Tang 12 ngut ki longkmie ban aireng ha kane ka elekshon MDC ha KHADC, bun eh na NPP saw ngut

Shillong, Rymphang 16 : Ki la don baroh haduh 158 ngut ki kyrtong kiban aireng ha kane ka elekshon MDC na ki 29 tylli ki constituency jong ka KHADC hynrei napdeng kine pat ki don tang 12 ngut ki kynthei lane ki longkmie kiba la mih shakhmat ban ïakhun ïa kane ka elekshon kaban long ha ka 21tarik mynta u bnai.
Kine ki 12 ngut ki kynthup ïa ki sawngut na ka NPP, mar arngut na ka HSPDP bad VPP, nangta arngut ki kyrtong shimet bad mar iwei na ka BJP bad UDP.
Ki kyrtong na ka NPP ki kynthup ïa ka kyrtong na Umsning Kong Macdalyne S Mawlong, kyrtong na Nongpoh Kong Rona Khymdeit, kyrtong na Mawkynrew constituency Kong Amanda Pakyntein bad ka kyrtong na Nongshken constituency Kong Grace Kharpuri.
Lah ruh ban kdew hangne, ba ka Kong Macdalyne Sawkmie bad Kong Grace Kharpuri ki bat ruh kum ki Executive Member ha ka Executive Committee ha kane ka samoi jong u 2019 – 2025.
Haba phai pat sha ki arngut ki kyrtong jong ka HSPDP, kine ki kynthup ïa ka Kong Badariti Lyngdoh na Nongstoiñ bad ka Kong Phinda Warjri na Mawthadraishan
Na ka VPP pat ki kynthup ïa ka Kong Aibandaplin Lyngdoh kaban aireng na Mylliem constituency bad ka Kong Deity Majaw na Laitumkhrah – Malki constituency.
Na ka UDP pat don tang iwei i kyrtong kata tang i Kong Naphishisha Marwein iba ïakhun na Umroi constituency. Kumjuh na ka BJP ruh tang iwei kata tang i Kong Daniella Nonglait na Mawlai consituency.
Ha kajuh ka por don arngut ki kyrtong shimet, kine ki kynthup ïa ka Kong Sony Kharjana kaba aireng na Sohiong constituency bad i Kong Arena Hynñiewta pat i aireng na Shella constituency.