Shillong, K’Lyngkot 09 : U President ka Meghalaya Pradesh Congress Committee (MPCC) ba dei ruh u MP na Shillong, Bah Vincent H Pala ha ka sngi Ba-ar u la kynthoh tyngeh ïa ka rukom treikam jong ka sorkar MDA ba ïalam da ka National People’s Party da kaba ong ba kane ka sorkar kam shym la lah ban pynurlong ïa ka kular.
Haba kren bad ki lad pathai khubor, u Bah Vincent u la ong, “La kadei naduh ka MDA-1 ne ka MDA-2, ki kular ban aikam haduh 5 lak ngut ki briew hynrei nga ngeit ba tang 1lak ruh ym pat don ba ïoh. Lada shu divide ïa u 5lak da u san snem katno ngut kiba la ïoh kama hynrei nod. Ki kular ïa u dewiong ha ka mat ïakhun elekshon hynrei hangne ruh nod (Zero).”
Nalorkata, u ong ruh ba ka sorkar ka kular ban ai ïa ka mining license hynrei hangne ruh nod, hynrei ki ai pynban da ki coke plant kaba kylla long ka bih ïa ki paidbah. “Mynta ki paidbah ki don ïa ka tamasa sohñiamtra khlem ki soh ñiamtra….”
Shuh shuh u kynnoh ruh ba ka rai ba ki shim kadei beit tang ïa ka pisa haduh ba la jot ka West Khasi Hills, Jaintia Hills bad ki khappud. “Nga ngeit ba ka (sorkar MDA) ka la phiel shisha. Baroh kim sngewtynnad ym tang ha kine ki 10 bnai ba ki don ha ka sorkar hynrei wat ha shwa kane ruh,” u la bynrap biang.
Utei u heh Congress u ong ruh ba dei na ka jingbym ïa burom bad sngewthuh jingmut jong ki nongïalam ha ka party Congress kaba la plie lad ïa ka NPP ban thaw biang ïa ka sorkar ha ka sien kaba ar.
La katta ruh u ong ki paidbah ka Meghalaya hadien ba ki la ïohi ïa kine ki jingtreikam jong ka sorkar baroh kin sa pyrkhat arsien.
“Tang ïa kane, ki paidbah kin sa kyndit bynriew bad kin pyrkhat arsien naduh kane ka elekshon sha Lok Sabha,” bynrap biang u Bah Pala haba kren hadien ka jingïalang bad ki nongtrei party ryngkat ka jingdonlang u heh ka AICC ba dei peit ïa ka Meghalaya u Dr. A Chellakumar.
