Nongpoh, Nailar 03 : Haba kren halor ka juk stad ba mynta la jan baroh ki kam ki jam jong ki paidbah la hap ban shaniah ha ka bording Ilektrik ban ïaid ki kam ki jam bad ka jingbym biang thikna ka bording ilektrik ha Ri Bhoi kane ka la pynsyrtok shibun eh ïa ki paidbah ban pyndep ïa la ki kam ki jam kiba ju pyndonkam da ka bording ilektrik.
Na ka bynta kiba don ba em kane kan nym don jingktah haduh katta katta ba ki lah ban thied da kita ki Power generator, Invertor ne kiwei ki kor ki bor ban pynïaid ïa ki kam ki jam jongki bad kane kan nym ïarap pat ïa kiba bun kiba duk ba rangli ha kaba tang shu thud ka bording ki kam ki jam ki la sahkut namar kim don pat da kiwei ki kor ki bor ban pyndonkam kumba lah ban leh da kito kiba don ba em kiba lah ban thied ïa ki kor ki bor jong ka juk stad ba mynta.
Haba ïa kren halor ka bording Ilektrik, ka sorkar jylla ka pynmih bun bha ïa ka bording na Ri Bhoi District namar ïa ka tlong jong ka bording ilektrik ha Ri Bhoi la tan na ka Pung Umiam bad kiba bun ki paidbah pat ki pynpaw ka jingsngewkhia ba wat lada ïa ka bording kaba bun la tan na Ri Bhoi, ki paidbah pat ki dang hap ban mad ïa ka jingthud jong ka bording kaba man ka por ha kaba teng teng ka la pynngiah shisha ïa ki paidbah.
Ka jingïakren halor ka jingthud ka bording ilektrik ha Ri Bhoi kam dei shu tang ha ka por ba don ka eriong erngit ne ha ka por ba thud ka bor mariang, hynrei wat ha ka por bay m don lyer ne slap ruh ki paidbah ki ju mad kajuh ka jingthud ka bording ilektrik bad lada ka long ha kane ka rukom ïano ki paidbah kin kynnoh ha kaba ïa ka bai bording pat ki hap ban siew thik thik khlem da don jingduna kumba la oh dor da ka tnad MeECL.
Halor kane ka jingthud palat ka bording ilektrik ha Ri Bhoi, u Mawphor u la ioh ban ïa kren bad kiba bun ki riew rangbah ka Ri Bhoi, ka sur kaba mih na kitei ki riew rangbah ka long ba ki pynpaw ka jingsngewdiaw halor kane ka jingthud ka bording ilektrik ha Ri Bhoi bad la dei ka por ba ïa kane ka kam la hap ban shim da ka sur jong ki paidbah ban pyrshah ïa ka sorkar ne ïa ka tnad MeECL ba ka hap ban pynbiang thik thik ïa ka bording bad lada kam lah ban pynbiang kum ka jingdonkam ki paidbah ka la dei ka por ban ïa mih paidbah ban ïa pyrshah halor kane ka jingthud palat ka bording ilektrik ha Ri Bhoi kaba la ktah shisha ym tang ha ki jaka nongkyndong bad ka ktah ruh wat ha jaka ba la kham long sor jogn ka District.
