Synñiang snam ka Company dewbilat ‘Green Valliey Industries Ltd’

Jowai, Ïaïong 12 : Kawei na ki Company pynmih dewbilat kaba don ha Nongsning East Jaiñtia Hills kaba la tip kum ka Green Valliey Industries Ltd. (Max Cement), mynta ka sngi kala pynlong da ka jingsynñiang snam kum ka dak ba kyrshan lem ïa kito kiba donkam kyrkieh ïa ka snam ha kano kano ka por.
Ïa kane ka Program synñiang snam la pynlong ha katei hi ka Company ba la wan ban ïarap kynshew ïa ka snam da ki Doctor bad ki nongtrei ka Jowai Civil Hospital Blood Bank Centre, Jowai. La ïoh jingkheiñ baroh ki nongwan synñiang snam kibakynthup ïa ki nongtrei ka Company bad ki nongshong shnong na katei ka thaiñ kila don baroh 47 ngut.
La ïathuh da ki bor pynïaid jong katei ka Company ba kane ka dei ka sien ba nyngkong ïa ki ban ïashim bynta bad ha ka juh ka por kan long ruh kum ka lad ban kyntu lang ïa kiwei ban ïanoh lem ïa ka snam na ka bynta ban ïada ïa ka jingim briew bad ka dei ruh ka sngi kynmaw burom ïa u (L) Gajanand Agarwal u nongseng ïa ka Compani.
U Pawaan Kumar Asst. Vice President Commercial Department haba ai jingkren ula ong kumba long mynta ki jingai snam ka long kaba donkam eh bad ka long ka lad ban ïarap kylliang da ka mynsiem ïa kito kiba kynduh jingeh bad donkam kyrkieh ïa ka snam.
Shuh shuh ula ong ba ka kam synñiang ka don ha kiba bun ki bynta la ka dei lyngba ki marbam bad kiwei de, hynrei ka jingsynñiang snam ka dei kawei na ki bynta ba kongsan kaba ïarap ïa ki mynsiem briew hapoh ka imlang ka sahlang.
Da kaba ula kular ruh kum ka kynhun jong u ki don ka jingthmu ban leh ïa kane ka jingsynñiang snam shisien ha ka shisnem da kaba kymtu lang ïa kiwei de ba kin ïadon bynta lang bad kane ka jingthmu ba bha.
Hashwa ban pynlong ïa ka jingsynñiang snam la ïoh ka jingduwai na u Waheh Shnong Nongsning ma Lambha Dhar bad ka jingkren na ki katto katne ngut na ki nongtrei katei ka Company. Katba na ka liang ka Company bad kumjuh na ka Jowai Civil Hospital Blood Bank kila ai ruh da ka syrnod sha baroh kitei ki nongsynñiang snem ei.