Synñiang pisa ka UDP ïa ka kong Kmoiñ Wahlang bad ïa u samla Steve Jyrwa

Mawkyrwat, ‘Nailur 15: Kum ka dak jong ka jingaimynsiem ïa ki ar ngut ki briew ha shwa kin leit ïa shimbynta ha ki jingïakop, na ka liang ka Executive Committee jong ka United Democratic Party (UDP) Mawkyrwat Circle ha ka sngi saitjaiñ jong ka taïew ka 14 tarik u ‘Nailur, 2024 ka la ïoh ban pynlong ka jingïalang pynkup burom ïa ki ar ngut kata ïa ka kong Kmoiñ Wahlang bad u samla Steve Jyrwa ha Phyllaw jong ka ophis treikam jong ka United Democratic Party (UDP) Mawkyrwat Constituency.
Kum ban shu kdew ba ka jingpynkup burom ïa ka kong Kmoiñ Wahlang ka dei namar ka jingpynkhreh jong ka, ba kan sa leit ïa shimbynta ha ka ‘13th Pan Pacific Masters Games 2024’ ka ban long ka Gold Coast, Queensland, Australia bad ïa u samla Steve Jyrwa u ban sa leit sha ka phainal jong ka jingïakop shad kaba la tip kum ka ‘India Best Dancer Season 4’ ka ban long ha Nongbah Mumbai.
Ha ka jingkren jong u bah Renikton Lyngdoh, MLA ka Mawkyrwat Constituency u la ong ba kane ka jingpynlong ïa kane ka jingïalang ka long kum ka dak jong ka jingburom bad mynsiem ïa ki ar ngut, kata ka kong Kmoiñ Wahlang kan sa leit ha ka jingïakop mareh thong ka ‘13th Pan Pacific Masters Games 2024’ bad u Samla Steve Jyrwa uba don mynta ha ka lynti ban rung sha ka phainal jong ka jingïakop shad ka ‘India Best Dancer Season 4’. Namarkata, u la kyntu ïa ki nongkitkam ba kin ai lem ka jingkyrshan kata ka jinglah jong ki da kaba kin thep ha ki synduk ba la pynkhreh lypa.
Hadien kaba kut jong ka jingïalum ïa u synñiang, la aiti noh ïa ki song pisa ba la thep ha ki synduk sha ka kong Kmoiñ Wahlang bad sha kiba ha ïing jong u samla Steve Jyrwa da u bah Renikton Lyngdoh Tongkhar ha ryngkat ka jingsakhi lang jong ki nongkitkam na ki Circle bapher bapher jong ka UDP Mawkyrwat Circle.