Synjor ka aiñ kylla jaka ïew ki surok ka PWD !!
![](https://mawphor.com/wp-content/uploads/2022/02/editorial.jpg)
Ka jingbun briew ne ka jingroi jong ki nongshong shnong ka dei kaba ym lait ban lait la ka long ha kano kano ka shnong ne kano kano ka ri ruh. Hynrei ka jingdon ia ka ain kaba khlain bad ia ki nongsynshar kiba iohi jngai ka pynlong ia ka nongbah ban long kaba iaid beit iaid ryntih. Katba hangne ha ka nongbah Shillong pat haba shu peit la i kum ka nongbah ne ka sor kam don satia ki nongsynshar. Ki lynti paidbah bad ki jaka iew ki la jyllei da ki nongdie jingdie bad la shu ia tur bad phriang katba mon haduh ba la khapngiah lut ka lynti ka synkieng ruh da ki nongdie madan bad ki nongkhaii beain bad dkhar bad khasi. Naduh na Iewduh shaduh Khyndai lad bad wat kiwei ki dong ruh katei ka jingiatur bad khnieh wat ia ki jaka iaid paidbah ruh ka la jyllei bha ha kine ki sngi wat ka pdeng surok jong ka Motphran ruh ka la kylla jaka iew syndon katba nangmih uwei u snem sha uwei u snem.
Ka Iewduh kadei kawei ja ki jaka kaba khapngiah tam bad ka daw kam dei ei namar ba la bun ki briew nongleit siew, hynrei ka daw kaba kongsan ka dei namar ba ki bor kiba peit bad synshar ia ka Iewduh kim lah ban teh lakam ia ki paidbah nongkhaii ba ki dei dei ia ki mar tang hapoh ki dukan ne ki basa kiba la ai sha ki. Hynrei wat ia ki lynti iaid ruh la phiah ha ki ar bynta bad la buh jaka die madan noh hapdeng. Kane kam dei eh ka jingisynei ia kiba duk kiba toi hynrei kawei na ka daw hi ka dei ka jingkangar pisa jong ki bor kiba dei peit ia ka jingiaid beit iaid ryntih jong ka Iew. Hooid baroh ngi sngewsynei ia kiba duk ba toi ba kin ioh ban kamai jakpoh, hynrei ym lah pat ban iapein ia ka jingkylluid bad ka jingiaid beit iaid ryntih jong ka rukom synshar khadar.
Ka Shillong kaba la ioh ia ka nam kum ka Scotland jong ka ri Mihngi na ka por sha ka por ka la nanglip rong lip rong katba nangmih ki sngi bad lah ban ong ba mynta lei lei ka la dei pynban kawei na ki jaka kaba lymmuh tam ha kine ki sngi ha ka liang ka iew ka hat. Ha kine ki sngi ka la long kaba thait bha ban rung shapoh jong ka Iewduh namar ba la pynwit palat ia ki lynti iaid baroh da ki nongdie madan bad ka iew ka la shu khap ngiah bad kam long shuh ka iew kaba khuid kaba suba . Nalor jong ka jingpynwit jong ki nongdie madan ha ki lynti iew wat kito kiba don la ka jong ka basa ruh ki ialeh katba lah ban phriang ia ki mar jong ki palat ia u pud u sam jong ka dukan ne ka basa jong ki. Kane ka la nang pynkhap ngiah shuh shuh ia ka iew kaba la bna nam jong ka ri Khasi.
Baroh ki lynti iaid jong ka Iewduh kiba la kham heh kim lait shuh na kane ka jingtur jong ki nongdie madan bad ruh ki nongdie dukan ba phriang ia ki mar jong ki shabar la ka basa. Ka bor jong ka pisa shisha la la pynduh lut ia baroh ki jingbit jingbiang jong ki paidbah bad ruh ka jingdon ia ka Iew kaba khuid bad kaba itynnad jong kane ka ri Khasi.
Ym tang ka Iewduh hynrei wat ki rud surok jong ka surok naduh Motphran shaduh Khyndailad ki la kylla long ki jaka die madan. Ha kine ki sngi ka Motphran ka la long kawei na ki madan iew luri lura bad ym don ain shuh ka ban teh lakam ia ka jingiaid beit iaid ryntih. Baroh ki la iatur beit ban die ia la ki jong ki mar k ibapher bapher ha Motphran. Ki rud jong ka surok naduh rum Motphran ter ter sha Bimola, shaduh them bijoi ki dap da ki poi ei kiba la pynwit ia ka surok bad pynthut ia ka leit ka wan jong ki paidbah. bunsien ki paidbah ki hap ban iaid lang bad ki kali ha surok namar ba ki sur surok bad lynti iaid kjat la klun lut da ki khar die madan.
Hato ym don nongsynshar shuh mo hangne ha ka nongbah Shillong naduh ki bor pyniaid iew haduh ka Municipal kaba peit ia ka khuid ka suba bad ka jingiaid beit iaid ryntih jong ka sor. Hato ym dei ba baroh ki la ia bieit sbai lut namar kata kim shlan shuh ban pynthut ia kito baroh kiba pynkhein ia ka ain bad buhai basa beain kat sha ba lap. Myntoi aiu ban pynlut da ka phew lak ban pynitynnad ia ka nongbah Shillong tang ha ka por Khristmas katba man ka sngi pat la shu ieh bein la kum ka nongbah kaba ym don sorkar ne ym don nongsynshar shuh !