Jowai, Naiwieng 20: Ka jingïalehkai phutbol haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai ha madan Kiang Nangbah Stadium, Dongmihsngi Jowai.
Haba phai sha ka jingïakhun kaba la long hynne ka Lah Sngi U Blei, ka kynhun ïalehkai jong ka 7 Wasa United kala khur ïa ka namjop hadien ba ka la lah ban pynliem da 5-2 kol ïa ka Mynthong.
Ha kane ka jingïakhun ki la don ar ngut ki rangïalehkai ka 7 Wasa United kiba la ïoh ban thep ar kol, kine ki kynthup ïa u Sucrip Manner haka minit ba 3 & 49 nangta u Dashngain Sukhlain haka minit ba 35 & 64 katba u Samehi Ryngki u la thep shi kol ha ka minit ba 48.
Na ka liang jong ka Mynthong ka la ïoh ban pynphai ar kol lyngba u Mo Nuwaz haka minit ba 6 bad u Md Aruwaz Khan haka minit ba 81 hynrei ka por ka la lyngkot eh ïa ka kynhun bad ka la shah rem noh.
La pyntip ba ka jingïakhun mynta ka sngi Hat Majai (21 tarik Naiwieng, 2023) kan long hapdeng ka Khimusniang pyrshah ïa ka Sailung Ialong ka ban sdang haka por 1 baje shiteng nohphai sngi.
