Khliehriat, Naiwieng 20: Ka jingïalehkai phutbol kaba la tip kum ka 1st Open Veteran Football Tournament na ka bynta kiba 40 snem shaneng bala pynïaid da ka East Jaiñtia Hills District Football Association (EJHDFA) kaba la long hynne ka sngi ha madan Deinchynrum, Khliehriat EJHD.
Haba phai sha ka jingïakhun kaba nyngkong naka liang ka kynhun ïalehkai jong ka 12 Dalloi FC bad ka Golden Lion VFT kila poi sha ka jingïakhiad da mar shikol 1-1. Ïa ka shikol na ka 12 Dalloi la thep da u Golden Mukhim haka minit ba 39, katba na ka Golden Lion la thep da u Dangaishuh Rymbai haka minit ba 58.
Haba phai pat sha ka jingïakhun kaba ar, ka kynhun ïalehkai jong ka EJTOTA FT kala ïoh ïa ka rai nongjop pyrshah ïa ka Khliehriat East VFT, namar ka jingslem wanpoi ha ka por ba la buh (walk over) ban poi ha madan ïalehkai, kumta ka EJTOTA FT ka la ïoh khur ei ïa ka namjop.
