Jowai, Risaw 30: Ka jingïalehkai phutbol haka kyrdan Super Division Football Tournament 2023 bala ai kyrteng ‘U Kiang Nangbah Memorial Trophy 2023’ ïa kaba la pynïaid da ka West Jaiñtia District Sports Association, (WJDSA) Jowai hynne ka Lah Sngi U Blei ha madan Kiang Nangbah Stadium, Dongmihsngi Jowai.
Haba phai sha ka jingïakhun ka kynhun lehkai jong ka 7 Wasa United ka la pynjemkhnap ïa ka Shangpung Lumiawmuchai da kaba pynbam haduh 5 kol ban khur ïa ka namjop.
Ka namtam ha kane ka jingïakhun ka la leit sha u Dashngain Sukhlain hadien ba u la khyrwit hat trick na bynta ka 7 Wasa United.
U Dashngain Sukhlain u la ïoh ban pynkhihjar nyngkong tang hadien 9 minit ba la ïaid ka por nangta bud sa ka kol kaba ar na u Riburom Jat haka minit ba 32 kaba la pynlong ïa ka kynhun ban lamkhmat da ar kol ha ka kylla step.
Ka jingïakhun kam shym la kut hangne, ha kaba ka 7 Wasa United ka la thep sa lai kol ha ka kylla miet ha ka 58 minit na u Surip Maner nangta bud sa ki ar kol kaba dei ruh ka hat trick jong u Dashngain Sukhlain ha ka minit ba 60 & 76.
La pyntip ba ka jingïakhun mynta ka sngi Hat Majai (31 tarik Risaw, 2023) kan long hapdeng ka Nangbah Mulang pyrshah ïa ka Sailung Ialong haka por 2 baje nohphai sngi.
