Jowai, Risaw 30: Ka lympung ïalehkai phutbol kaba la tip kum ka “Chatister Kharkongor Memorial Trophy 1st Division Football Tournament – 2023 bala pynïaid da ka West Jaiñtia District Sports Association, (WJDSA) Jowai kaba la long hynne ka Lah Sngi U Blei ha madan Kiang Nangbah Stadium, Dongmihsngi Jowai.
Haba phai sha kane ka jingïakhun, ka kynhun ïalehkai jong ka Wahiajer kala khur namjop hadien ba ka la pynliem da 2-1 kol ïa ka Moosalyngkat.
Ka Wahiajer ka la ïoh ban pynkhihjar nyngkong dei lyngba u Marlangki Suting haka minit ba 15 bad hadien katto katne minit u Niwan o Gatphoh u la pynbud sa ïa ka kol kaba ar haka minit ba 28.
Na ka liang jong ka Moosalyngkat ka la pyrshang katba lah ban pynphai ïa kitei ki ar kol hynrei ka la ïohlad ban thep tang shi kol kaba la wan na u Meaban Thubru haka minit ba 64, bad haduh kaba kut jong ka por ym shym la don shuh ba lah ban thep kaba la pynlong ïa ka Wahiajer ban khur ïa ka namjop da 2-1 kol.
Ka jingïakhun mynta ka sngi Hat Majai (31 tarik Risaw, 2023) kan long hapdeng ka Sabahmuswang pyrshah ïa ka Moosyiem Shangpung haka por 12 baje shiteng sngi.
