Subroto Cup: Mynta yn ïaknieh nam lahduh ka H. Elias pyrshah ïa ka Assam Rifle
Kynthei Under-17: ïewranghep pyrshah ïa ka ka H. Elias
MFA Turf-Polo, Jylliew 30: Ki samla lud kynthei bad shynrang jong ka skul H-Elias H.S. School kiba ïashimbynta ha ka lympung District Level Inter School Subroto Mukherjee Cup 2023 kyrdan Under-17 ki la ïoh ban jam sha ka final hadien ba baroh ar kynhun, Kynthei bad shynrang ki la khur ïa ka namjop ha ka semi final kaba la long hynnin ka Sngi Saitjaiñ, ha MFA Turf, Polo.
Haba phai sha ka jingïalehkai semi final kaba nyngkong jong ki shynrang Under-17, kaba la long ha ka por 12 baje mynsngi ha MFA Turf, Polo, ki khynnah skul jong ka H-Elias H.S. School ki la lah ban jop salit da shi kol ïa ka Umphyrnai Pres. Sec. School. Bad ïa ka namtam la ïoh ban khur da u Yohaan Benjamin u ba la thep ïa ka kol ban btin lynti ïa ka skul sha ka final jong ka Subroto Mukherjee Cup 2023.
Haba phai sa sha ka semi final kaba ar jong ki shynrang hapdeng ka Assam Rifle Public School ka la pynkhyllem noh ïa ka Shillong College H.S. Education lyngba ka tie breaker hadien ba ka jingïakhun hapdeng jong ki ka la ïakhaid da mar 1 kol.
ïa ka final hapdeng ki shynrang la pynkhreh ban pyndep ha ka 1 tarik u Naitung ha ka por 1 baje nohphaisngi, ka ban long hapdeng ka H-Elias H.S. School pyrshah ïa ka Assam Rifle Public School.
Katba na ka liang jong ki kynthei ba ïakhun ha ka kyrdan, ka kynhun ïalehkai kynjatbol jong ki thei Under 17 jong ka skul ïewrynghep Sec. School sa shi sien pat ka la ïoh ban bteng ïa ka lynti ïaid jong ka sha ka final jong ka lympung Subroto Mukherjee Cup 2023 bad kane ka la wan hadien ba ka la lah ban pynliem noh ïa ki thei lehkai jong ka skul Tyrsad Higher Sec. School, ha ka jingïakhun semi final kaba la long hynnin ka sngi ha MFA Turf, Polo.
Kane ka skul kaba la mihkhmat ïa ka jylla shabar bad shahrem noh ha ka quarter final ha ka Haryana jong u snem ba ladep ka la ïoh ban khur ïa ka namjop da 3-1 kol ha ka semi final kaba nyngkong jong ki kynthei Under-17, kaba la long ha ka por 9 baje mynstep.
ïa ka namtam ha kane ka jingïalehkai ka la leit sha ka Larihun Songthiang (20 bad 51 minit) kaba la ïarap ban thep ar kol na ka bynta ka kynhun, bad naNazareen Nongdhar (5 minit) katba ka shi kol jong ka Tyrsad Higher Sec. School la thep da ka ïaiti-bahun Kongsit (54 minit).
Haba phai sha ka semi final kaba ar jong ki kynthei, hapdeng ka H Elias Secondary School pyrshah ïa ka Umpohliew Jingtip H.S.S ka la jam sha kaba kut ha kaba ki thei ka skul H Elias Sec. School ki la jop da 2 kol ban pynthikna ïalade ha ka final mynta u snem.
ïa kine ki 2 kol ba la ïarap kyntiew ïa ka H Elias Secondary School ban ïoh ïakhun ha ka final la ïoh ban thep da ka Elviorika M. Sohkhlet (60+9 minit) bud sa ka kol kaba ar shuwa ban khylliap ïa ka jingïakhun, ïa kaba la thep da i Ridalin Suting (60+11).
Da kane ka namjop ka H Elias Secondary School kan sa hap ban ïakhun pyrshah ïa ka ïewrynghep Sec. School ha ka jingïaknieh namlahduh ban ïoh mihkhmat ïa ka jylla, bad ka jingïakhun kan long lashai ka sngi ha MFA Turf, Polo ha ka por 9 baje mynstep.