Bengaluru, Ïaïong 20: U heh pulit barim ka jylla Karnataka u Om Prakash la shem ba u la ïap ha la ka jong ka ïing ha Bengaluru ha ka sngi U Blei. Une u heh pulit u la don ha ka rta kaba 68 snem. Ka khubor ka ïathuh ba shem ba hapoh ka ïing jong u la lynkien da ka snam ha madan ha kaba ha ka met jong u la lap ïa ki dak mong ba shah dung kaba la bunsien ha ki bynta jong ka kpoh bad ka shadem, ïathuh ki pulit ka jylla.
Ka kurim jong u ka Pallavi, ka khun jong u bad kiwei pat ki dkhot jong ka ïing ki la don ha ïing haba jia kane ka jingjia, ong ka tyllong khubor. Ki pulit ki la tohkit ïa kine baroh laingut. Ki pulit ka control room ki la ïohpdiang ka jingpyntip na uwei pat u briew halor kane ka jingjia, ïathuh ka tyllong khubor.
Katkum ka tyllong khubor la ïathuh ba u Prakash bad ka kurim jong u, manla ka por ki ju don ka jingïamai ïania. Na ka liang u Additional Commissioner of Police ka Bengalaru u Vikas Kumar u la ong ba la ïohi ba dei da ka tiar kaba nep ba la pyndonkam ban thombor ïa une u pulit ophisar ba la shong thait.
“Mynta ha ka nohphai sngi ha ka por kumba 4 haduh 4.30 baje janmied, ngi la ïoh ka jingtip shaphang ka jingkhlad noh jong u DGP bad IGP barim u Om Prakash. La pyntip ïa u khun jong u bad u la phah ruh ka jingujor pyrshah ïa kane ka jingjia bad dei halor kane yn sa register ïa ka FIR,” ïathuh u Kumar sha ki lad pathai khubor. “Hadien ba la dep register ïa kane ka jingjia, ka la don ka jingtohkit kaba bniah bad halor kane kam pat don kano kano ka jingkem. Katkum ka jingsdang ka jingtohkit la ai jingmut ba kane ka lah ban dei ka kam pohïing, imat ka la don ka jingpyndonkam da ka tiar kaba nep kaba pynlynkien ha ka madan da ka snam bad kaba la long ruh ka daw jong ka jingkhlad noh jong u,” u la ong.
Ki pulit ki la sdang ruh ban tohkit ïa ka Pallavi bad ïa ka khun jong ka. Ki pulit ki la suba ba lah ban donkti ki dkhot jong ka ïing. Ïa ka met la phah ban leh ïa ka autopsy. U Om Prakash u dei u Indian Police Service (IPS) officer jong ka 1981-batch. U la shah thung kum u Director General of Police ha u Lber 2015. Ha shwa kane, u la khlieh ruh ïa ka Fire and Emergency Services, and Home Guards.
