Nongpoh, Ïaiong 20: Ka kynhun jong ki khynnah kiba ju pynlong jaka lehkai ne stunt ha ka surokbah National Highway-6, manla ka sngi u Blei ki la kynran dien hadien ba ki la ïoh jingtip ba ki don ki Pulit kiba la ap lypa ha ka thaiñ Umsamlem kaba dei ka jaka kaba ki nongniah thuk thuk ar sha ka ki ju mlien ban pynlong kum ka jaka lehkai kaba pynsyier ïa kiba bun ki paidbah nongleit nongwan.
Lah ruh ban kdew hangne ba ka jingjia aksiden kali ha kine ki khyndiat bnai ba ladep ka jur bha ha kylleng ki bynta jong ka Ri-Bhoi District, kaba la wanrah ruh shibun ki jingmynsaw jong ki paidbah khamtam ka jingjia ba sngewsih bad ka jingduh noh ki mynsiem briew, hynrei kiba bun ki paidbah ki ju sakhi ba ka sngi u Blei ka long kum ka jaka lehkai ki khynnah kiba ñiah ïa ki thuk thuk ar sha ka ha kaba da ki kynhun kynhun ki hiar sha ka thaiñ Umsamlem bad ka thaiñ Jyntru ha Ri-Bhoi District ban ïakop pyni ïa ka sap ñiah ïa ki ar sha ka bad sngew sarong namar ka jinglum ruh ki paidbah kiba peitkai ïa ki bad thep ruh ha ki YouTube channel.
Hadien ka jingmih ha ki lad pathai khubor bad ka jingujor jong kiba bun ki paidbah, ki pulit ka Umsning Police Station mynta ka janmiet ki la pynlong ka jingpynap ha surok bah ban lap ïa kitei ki khynnah, hynrei bun na ki ki la ïoh jingtip ba ki don ki pulit ki khlem nud satia ban wan nalor ka jingdum bad slap ka suiñ bneng, bad don ruh ki nongñiah ar sha ka mar sien ïohi ïa ki pulit ki phai biang na ka juh ka liang kaba dei ka wrong side ban phet krad ïalade.
Ka jingdon jong kitei ki nongñiah thuk thuk ar sha ka man ka sngi u Blei ka pynthud shisha ïa kiba bun ki paidbah ba leit ba wan na ka jingpynher sted bad pynlong kum ka jaka lehkai ha surok bah kaba ngim lah ban tip ha kano ka por ka jingbakla kaba wanrah ïa ka jingjia ba sngewsih ym tang ïa ki, hynrei wat ïa ki paidbah ba leit ba wan na kane ka surok bah.
Haba kren sha ki lad pathai khubor, u Bah E Marak, Officer In Charge ka Umsning Police Station u la ong b akum ka tnad pulit ka la ïoh shibun ki jingujor na ki paidbah halor ka jingdon ki khynnah kiba ju wan stunt man ka sngi u Blei, bad dei halor katei ka daw na ka liang ki pulit mynta ka sngi ki la ïeng ha ka thaiñ Umsamlem, hynrei bun na ki ki duna lehse na ka jinglong ka suiñbneng bad ki don tang katto katne kiba wan kiba mar sien ïohi ïa ki pulit ki pynsuki ïa ki thuk thuk, bad kum ki pulit ki la hikai bad pyni ïa ki ba kim dei ban leh kai ha surok namar kam dei tang ka jaka ïaid jong ki hynrei ki don shibun ki kali kiba leit ba wan.
U la ong ruh hadien kane ka jinghikai, na ka liang ki pulit ki la kyrpad ruh ïa kitei ki nongñiah thuk thuk ban sangeh noh ban pynlong jaka lehkai ha ki surok bah, hynrei ban ñiah da ka lynti bad lada kitei ki khynnah kin dang bteng ban leh ïa katei ka kam na ka liang ka tnad pulit ka la maham ban leh da kaba tyngeh namar ka jingpynkheiñ aiñ.
