Khliehriat kyllalyngkot 29: Kawei ka longkmie ba la tip kyrteng kum ka (L) . Nildres Dkhar, 60 snem kyrta la suba ba ka la shah pyniap dusmon ha ki briew ki bym lah satia ban tip bad ïa ka met jong ka la lap da ki pulit mynta ka sngi na ka iïng sah jong ka hi ha Ladrymbai Dongwah.
Ki khubor pulit ki iathuh shuh shuh ba katkum ka jingiathuh ka khun jong katei ka longkmie ba ka kong Nildres Dkhar dang myn ha 27 tarik mynta u bnai kyllalyngkot ha ka por 8.30 mynstep ka kong ka dang leit ban peit bad jngoh ïa ka khun jong ka ha Ladrymbai Datsimpeiñ bad ha ka por 6 baje janmiet ka la leitphai noh sha la ïing ha Ladrymbai Dongwah bad naduh katei ka por janmiet hi ka kong Nildres Dkhar ka la jah.
Hadien ba ki pulit ki la ioh jingtip halor kane ka jingjah ka kong Nildres Dkhar, ki la pynlong ïa ka jingwad bad wad jingtip bad ki la leit sha ïing sah ka kong Nildres Dkhar bad ki la lap ba ka ïing jong ka ka khang tala, na ka liang ki pulit ki la pynpait ïa ka tala ba khang na sha bar bad ki la lap ba ka kong Nildres Dkhar ka la thiah iap hapoh ïing, halor kane na ka liang ki pulit ki la suba jur ba katei ka longkmie ka la shah pyniap.
Ïa ka met jong katei ka longkmie ki pulit ki la rah noh sha Khliehriat Civil hospital ban leh ïa ka postmortem ban lap ïa ka jingshisha halor ka jingiap katei ka longkmie.
Shuh shuh ki pulit ki dang wad ban lap ïa u runar uba la pyniap ïa katei ka longkmie.
