Ha ka jingkhreh leit pule Nurse sha Bangalore shah dkhat jingim noh ka samla

Nongstoiñ, K’lyngkot 29: Ka samla Lilyiora Wahlang 21 snem ka karta kaba shong ba sah ha ka dong Mawbyrshem shnong New Nongstoiñ, ka don ha ka jingpynkhreh ban ïoh leit pule Nurse noh sha Bangalore hadien ba ka la pyndep ïa ka Class XII Science. Hynrei, kyndit kynsan ha ka 20 tarik kane ka samla ka la duh noh ïa la ka jingim ha ki briew thrang snam, kiba la shim noh ïa ka jingim jong ka ha ka jingjia kaba la jia ha Wahriat.
Katkum ka jingïathuh ka kmie jong kane ka samla ba la khlad noh la ong ba na ka liang ka ïing ka sem, ki dang pynkhreh ban pynbit pynbiang ïa ki jingdonkam ban ïoh phah noh ïa ka sha Bangalore satang katto katne por. Pynban u lyoh bad um u la wan tap noh ïa ka ïing ka sem, ha kaba ki la hap ban duh noh ïa kane ka khun tip sngi.
La ong ba hadien ka jingjia shah pynïap kaba la jia ha ka 20 tarik, na ka liang ka ïing ka sem ki la dep ban ai FIR sha ki pulit. Nalor nangta ka kmie ka la ong ruh ba ki pulit ki la ong ba ka dei ka jingjia shah pynïap (murder case). Nangta ki pulit ki dang ïa ka kaiphod kaba biang haduh mynta.
Hynrei hapdeng ka jinglynga mynsiem bym lah batai na ka liang ka ïing kam banse ban pynpaw pyrthei ba ka khun ba la khlad noh, ka dei kaba shi sur bad wat tang ka mobile ruh kam don satia haduh mynta mynne.
Namarkata, ka ïing ka kyntu sha ki bor ba halor naduh u MLA MDC, u DC bad SP, nangta ki kynhun seng trei mon sngewbha, ba kin sngewbha ban shimkhia lem ïa kane ka jingjia, khamtam ban thwet tyngeh ïa u briew lane ki briew ba don kti, khnang ba ka khun kan ïoh ïa ka hok bad ba ka jingïoh kem noh kan long ka jingshngaiñ ïa kiwei pat.