Shillong, Naitung 03: Ka lympung ïalehkai phutbol ‘State Level Subroto Cup 2025 Football Tournament’ kaba la sdang naduh ka 01 tarik Naitung, 2025, ka la jam shakhmat mynta sha ka semi final.
Kane ka lympung kaba wanrah lang ïa ki kynhun ba kynsai tam na baroh 12 tylli ki District jong ka jylla Meghalaya, ba la pynïaid da ka tnad Sports kan bteng haduh 05 tarik u Naitung, 2025, bad la pynlong ïa ka ha lai tylli ki jaka ha nongbah Shillong, kata ha SAI Centre ha NEHU (na bynta ki U-15 boy), ka madan First Ground jong ka SSA Stadium ha Polo (na bynta ki U-17 boy) bad ha Mawlai Madan Heh (na bynta ki U-17 Girl).
Baroh ki jingïakhun semifinal yn pynlong ha kane ka sngi Thohdieng ha madan First Ground-SSA Stadium ha Polo. Katkum ki kynhun ba la ïohrung, dei tang ka Ri-Bhoi District bad ka West Jaintia Hills kiba dang don baroh lai tylli ki kynhun ki ban ïakhun ha ka semi final ha baroh lai tylli ki kyrdan.
Ka East Khasi Hills (U-15 Boys & U-17 Girls) bad ka East Jaintia Hills (U-17 Girls & U-17 Boys) ki dang sah sa mar ar tylli ki kynhun, katba ka Eastern West Khasi Hills bad ka North Garo Hills ki dang sah sa mar kawei.
Haba phai sha ki jingïalehkai hynne ka sngi Palei; ha ka kyrdan Under-15 jong ki khynnah shynrang: ka Mawtneng UP&SS (Ri-Bhoi) ka la pynliem da 5-0 kol ïa ka St Mary’s Sec School Baiza (EGH); ka Govt HSS Baghmara (SGH) ka la jop da 2-1 kol ïa ka Govt Boys HSS (WGH); ka Assam Rifles Public School (EKH) ka la jop kput haduh 9-0 kol ïa ka St Claret HSS (SWGH); bad khatduh ka Govt Boys HSS Jowai (WJH) ka la jop da 2-0 kol ïa ka KJP Synod Sepngi HSS Nongstoin (WKH).
Ha ka U-17 jong ki samla lud kynthei: ka Tyrsad HSS (EKH) ka la jop da 3-0 kol ïa ka Jakrem Presbyterian HSS (SWKH); ka North Liberty HSS (WJH) ka la jop suk haduh 8-0 kol ïa ka Govt Boys HSS (WGH); ka Kyrshai Govt LP&UPS (WKH) ka la jop da 1-0 kol ïa ka Little Star English Medium SS (EWKH); ka KGBV School Samanda (EGH) ka la jop da 1-0 kol ïa ka St Claret HSS (SWGH).
Ha ka U-17 jong ki samla shynrang: ka North Liberty HSS (WJH) ka la pynliem ïa ka OM Roy Memorial HSS (EKH) da 1-0 kol; ka Wapung HSS (EJH) ka la pynbam kput haduh 10-1 kol ïa ka St Claret HSS (SWGH); ka Bajengdoba HSS (NGH) ka la jop da 2 -0 kol ïa ka Govt Boys HSS (WGH); ka Nongjri Presbyterian SS (Ri-Bhoi) ka la jop da 4-0 kol ïa ka Horirai Syiemlieh Memorial HSS (SWKH).
Ka prokram ïakhun semi final mynta ka sngi (04 tarik Naitung, 2025) ki long kumne harum: Ha ka kyrdan U-15 Boys; ka Assam Rifles Public School (EKH) kan ïakhun pyrshah ïa ka Mawtneng UP&SS (Ri-Bhoi) ha ka por 7 shiteng mynstep, nangta ka Little Star English Medium SS (EWKH) kan aireng pyrshah ïa ka Govt Boys HSS Jowai (WJH) ha ka por 9 baje mynstep.
Ha ka kyrdan ïalehkai U-17 Girls: ka Nongjri Presbyterian SS (Ri-Bhoi) kan aireng ïa ka North Liberty HSS (WJH) ha ka por 10 shiteng mynstep, nangta bud sa ka Tyrsad HSS (EKH) pyrshah ïa ka Lotus SS (EJH) ha ka por 12:15 baje mynsngi.
Ha ka U-17 Boys: ka North Liberty HSS (WJH) kan ïakhun pyrshah ïa ka Bajengdoba HSS (NGH) ha ka por 2 baje mynsngi, bad khatduh ka Nongjri Presbyterian SS (Ri-Bhoi) kan aireng pyrshah ïa ka Wapung HSS (EJH) ha ka por 3:45 baje nohphai sngi.
