H a kine ki khyndiat sngi ki rynsan social media ki la shlei da ki video lyngkot bad ki jingkynthoh, ki jingïaroh ba harukom kiba ïadei bad ka ishu jong ki nongdie madan ha ki bynta jong ka Khyndailad. Lada phai shwa sha ka jingkynthoh, kiba bun ki kynthoh da kaba ong ba ka sorkar ka la knieh noh ia ka pliang ja jong ki nongdie madan bad ka iing ka sem jong ki. Don pat kiba kynthoh da kaba ong ba kumno ka sorkar kan leh lada jia ba ha ka jaka ba thymmai ym don shuh ki nongthied kumba long ha Khyndailad.
Napdeng kine, don pat kiba ai jingmut ïa ki nongdie madan ba kan bha shibun ba kin pdiang ïa ka kabu kaba ai da ka sorkar bad ban pyrshang ïoh kumno re kumno ka jaka ba ki pynkhreh ka kham thnem arshah ban ïa kaba long mynta. Nalorkata, ki don ruh kiba ai mynsiem ba lada baroh ki nongdie madan ki shong ha kawei ka jaka, khlempep baroh hi ki paidbah kiba ju sngewtynnad ban thied jingthied na ki, kin leit beit sha kito ki jaka ba kyrpang ba ka sorkar ka buh ïa ki.
Ha kawei ka liang pat kito kiba ïaroh ïa ka sorkar ba ka shim ïa ka sienjam ban pynkynriah noh sha kawei ka jaka ïa ki nongdie madan ki ong, ba ki don palat 400 ngut ki nongdie madan katba ki nongiaid lynti pat ki don palat 40,000 ngut. Don pat kiba ong ba ki paidbah ki kyrshan ïa ka sorkar ha kane ka kynti ba mynta namar ka jaka ka la khapngiah shaba palat haduh ba la hap ban ïa tyngkhuh para briew haba ïaid lynti.
Don ruh kiba ong ba ki nongïaid kjat ruh ki don la ka jong ka hok ban ïaid kumta ka shong ha ka jingstad jong ka sorkar ban bate lang ïa ka jaka na ka bynta ban ïa im bad ïa myntoi lang khlem da ktah ne pynduh nong ïano ïano. La ïohi ruh ba ha ka sngi kaba nyngkong ba ka Shillong Municipal Board ka sdang ïa ka jingkhynra ïa ki nongdie madan ha kato ka sngi kiba bun ki paidbah ki pynpaw ka jingsngew synei hynrei katba nang ïaid ki sngi pat hadien ka jingpynshai na ki bor sorkar bad na ka Municipal, ki paidbah ki la kham thanda ka jingkynthoh bad ai jingïaroh pat ïa ka sienjam ba la shim da ka sorkar.
Tangba hapdeng kine, ki don ruh kiba kyntu ïa ka sorkar ba kan peit ba kito kiba dei hok ban ïoh ïa ka bhah ki dei beit ban ïoh khamtam eh kito kiba la im bad pynheh bad pynnang pynstad ïa ki khun da katei ka kam die jingdie ha rud surok.
Lada phai sha ka jingkular jong ka sorkar jylla, kumba la ïathuh da u Myntri ba dei peit, ka sorkar kan ai haduh 10,000 tyngka kum ka bai kyrshan ïa kito ki nongdie madan kiba la paw kyrteng. Ym tang katta, kin ïoh ruh sa mar 2,000 tyngka shi bnai na ka bynta san bnai kum ka jingkyrshan ïa ki namar ïoh kumno re kumno ka iew ka hat kam pat da long namar ka dang dei ka jaka thymmai. Lada ka long shisha kumta, ki nongdie madan ki la dei ban sngewnguh ïa ka jingïohi jngai jong ka sorkar na ka bynta jong ki.
Ha kawei ka liang, sngew dei ruh ban ai ka jingïaroh ïa ka sorkar lada ka lah shisha ban pynkylla dur ïa ka Khyndailad ban kylla long noh kata ka jaka tang ban iaid kjat khlem da shah shuh wat ïa ki kali ban ïaid lyngba ka surok kaba naduh Khyndailad ter ter kaban mih sha Lad-Umsohsun. Shisien ba ka la shim ïa ka sienjam ban ym shah shuh ïa ki nongdie madan ka dei ruh ban pyntikna ba wat ki tiar ki tar na ki dukan ruh kim dei shuh ban mih shabar. Da kaba leh kumne, khlem artatien ki paidbah hi kiban mih shakhmat ban ïaroh ïa ka sorkar. Kawei ruh lada la kylluid ka lynti ïaid kjat, ki kmie ki kpa ki la kham shngain ban ïalam kai ïa ki khun ban ïaid na katei ka jaka ym kumba long mynta tang shu lait na kti ban wad khun la jynjar bad kulmar thlim naba la khapngiah kat shaba phai da u briew suda.
Haduh mynta hi, hap ban ap shwa kumno kane ka jingpynkhreh jong ka sorkar kan long, la kan lah neem ban pynkohnguh ïa ki nongdie madan ban leit sha ka jaka thymmai bad lada ka lah kan jin da la long ka khubor kaba sngewtynnad ïa baroh. Tangba ha kawei pat ka liang, hap ban pyrkhat ruh ba lada ki nongdie madan ki leit sha ka thymmai ka jingangnud jong ki ka long ba kin ïoh ban die bad pynïaid iew ïa ki mar jong ki kumba ju long baroh shi katta bad kane hi kan urlong tang lada ki paidbah hi kin kyrshang lang ïa ki da kaba leit ban thied jingthied na kitei ki jaka thymmai kumba ki ju leh baroh shi katta.
