Shillong, Nailar 22: Ka Mawkriah West SC ka la ïoh ban khur ïa ka jingjop ha ka jingïalehkai kaba la long hynne ka sngi jong ka lympung Third DIVISION 2024 ba la pynïaid da ka Shillong Sports Association ha SSA Stadium, Polo, katba ka jingïalehkai kaba bud ka la kut ha ka jingïakhaid.
Ha ka jingïalehkai kaba nyngkong ka la long hapdeng ka Lumdiengjri SC pyrshah ïa ka Mawkriah West SC, ha kaba ka Mawkriah ka la wanphai wat hadien ba shah lamkhmat shi kol ban jop kput da 5-1 kol.
Ka Lumdiengjri SC ka la ïoh ban pynkhihjar nyngkong lyngba u Desilva Pyngrope ha ka 44 minit, hynrei u Jeremy Nongbri u la pynïakhaid ha ka 58 minit, shuwa ba u Ronald Lyngdoh (66 min), u Honour Nongbri (73 min), u Hosterfield Kharbudnah (88min) bad u Sainkupar Sun (90+1 min) kin pynkhih ïa ki kol ba hadien ban pynthikna namjop.
Haba phai pat sha ka jingïakhun kaba ar, ka Rynjah SC bad ka Mawshbuit SC ki la ïasam mar shi point naba ïakhaid da mar 2 kol. Na ka Rynjah SC la thep da u Lalduhawna Caawgwthu (19 min) bad na u Paosagun Khongsai (22min), katba ïa ka Mawshbuit SC la thep da u Lurshai Wankhar (48min) bad na u Jayden Langstang (66min).
Mynta ka sngi kin don ar tylli ki jingïalehkai, kaba nyngkong ha ka por 12:45 baje mynsngi hapdeng ka Tynring SC pyrshah ïa ka Lamlynti SC, nangta kaba ar ha ka por 3:45 baje nohphaisngi hapdeng ka Kharang SC bad ka Mawryngkneng SC, ha SSA Stadium, Polo.
