Pynthikna u Ma Sniawbha ba ka NPP kan ïatrei lang bad ki paralok hapoh ka MDA haduh ba kut ka 5 snem

Shillong, Nailar 21 : U National General Secretary ka NPP bad Symbud Myntri Rangbah u Ma Sniawbhalang Dhar ha ka sngi Balang, ula pynkut noh ïa baroh ki jingïa mutdur bad ki jingantad ba ka NPP kan sa weng noh ïa ka UDP ne HSPDP na ka Sorkar Meghalaya Democratic Alliance (MDA) hadien ba wan ïasoh ki 3 ngut ki MLA ka Congress da kaba u la pynthikna ba ka NPP da lei lei ruh kan ym leh kumta hynrei kan ïai burom ïa baroh ki parti kiba ïa synrop lang ha ka sorkar MDA naduh ka UDP, HSPDP, BJP kumjuh ruh ki Independent MLA bad kan ïai ïïatrei bad ki haduh ba kut ka samoi san snem khlem da weng shuki myntri ïano ïano ruh.
U Bah Sniawbhalang ula ong ba ka NPP kan ïai bteng ban ïatreilang bad ki paralok jong ka Sorkar MDA ym tang haduh ba kut ka samoi treikam ba san snem pura hynrei wat hadien ka san snem ruh kan dang ïai bteng beit ban ïatrei lang bad kine ki paralok jongka kiba la ïatrei lang naduh u 2018 haduh mynta.
Kane ka jingkren jongu ka long hadien ba la mih ki jingïa antad bad mutdur ba ka NPP ka lah ban weng myntri noh na ka UDP ne HSPDP ban ïoh ai bhah ïa ki MLA ka Congress kiba la wan pynïasoh sha ka NPP dang ha kine ki khyndiat sngi.
Haba ïakren bad ki nongthoh khubor, u Bah Sniawbha ula ong “Ngim don satia ïa kano kano ka jingthmu ban weng ïa uno uno u Myntri lane pynkut ka jingïadei bad kiwei pat ki paralok ba ïatreilang ha ka MDA tang namar ba ngi la ïoh ka jingbun paid hapoh ka ïing Dorbar Thawaiñ ka jylla bad ba la lah ban synshar marwei. Ngi la ïatreilang naduh u snem 2018 bad ngi kwah ban ïai bteng ka jingïatreilang tad haduh da kut ka samoi ba san snem bad wat hadien u 2028”.
Ka NPP kala tam ïa u magic number da ka jingkot ïa ka jingdon MLA sha ka 31 ngut ha ka ïing Dorbar ba 59 ngut ki dkhot hadien ba wan ïasoh ki 3 ngut ki MLA ka Congress.
Haba pynpaw ïa ka jingshaniah jong ki paralok ba ïatreilang ha ka MDA, ula ong ‘Wat khuslai, ngin ïatreilang da ka jingkmen bad ki paralok jong ngi bad ngi shaniah ruh ïa ki. Namar kata, kan ym don satia kano kano ka jingbujli Myntri watla kala don ka jingkylla ha ka saiñ pyrthei”.
“Hynrei, hooid lada ki paralok ba ïatreilang ki kwah ban pynkylla (bujli ïa ki Myntri nala ki jong ki party), kane kan shong eh ha ngi, ka dei ka jingkwah jong ki” ula bynrap.
Haba kylli, une u Nongïalam ka NPP ula ong “Ngi burom ïala ki paralok-ka UDP bad HSPDP- bad ngin ïai bteng bab ïatrei lang bad ki wat hadien ka elekshon 2028”.
Shuh shuh u ma Sniawbha u la ïathuh ba ki MLA ka NPP ki pynpaw ka jingsngewkmen halor kane ka jingwan pynïasoh ki lai ngut ki MLA na ka Congress bad kumta kam don kano kano ruh ka jingïapher jingmut hapoh ka party.
“ Kan ym don kano kano ka jingïapher jngmut. Ngi dei ka Party kaba kmen tam bad kaba long ryntih lang ha kiei kiei baroh. Nga tharai phi la sakhi hi da lade mynta la hynniew snem. Baroh ki MLA ki pynpaw ka jingkmen bad shaniah ha ki nongïalam ka party khamtam ha u Myntri Rangbah ka jylla u Conrad K Sangma” ong biang u ma Sniawbha.
Halor ka jingkylli hato ka don ne em ka jingthmu ban pynkylla nongïalam khamtam mynta ba la nang bun ki MLA Khasi ban ïoh Myntri Rangbah da u Khasi, u ma Sniawbha u la ong “ Mano ba dawa bad mano ba kwah namar kam don ei ei ruh kum kata hapoh ka party na kata ka daw phi ïohi ha kine ki hynniew snem kam don satia kano kano ka jingïaknieh shuki ne jingbym ïasngewthuh jingmut hapoh ka party namar ngi ïa long kum kawei ka ïing ka sem kaba suk bad kmen”
Haba la kylli hato u kloi ne em ban shimti ïa ka kam Myntri Rangbah ka jylla u ma Snaiwbha u la jubab ki paidbah ki dei ban ïa duwai jur ban ïoh ïa u Myntri Rangbah uba tbit, uba shim khia na ka bynta ka jylla kumba long une u Myntri Rangbah mynta.
U la ong “ To ngin ïa pynkut ïa kata ka jingïakren namar kata ka jingkylli kam mih satia. Na ka bynta u Myntri Rangbah bad ki Nongïalam ki paidbah ki dei ban duwai ban ïoh ïa u Myntri Rangbah uba bha tam kata kaba donkam kam pher lada shim u Mr A ne u Mr B hynrei kaba kongsan ka dei u nongïalam uba bha uba pyrkhat ia ki paidbah tang kata nga kwah ban ong bad pynkut”.