Shillong, Nailar 22: Ka kynhun ïalehkai phutbol Under-15 shynrang jong ka jylla Meghalaya ba la mihkhmat da ka Nongjri Presbyterian Secondary School na Ri-Bhoi District, ka la bteng ïa ka lynti ïaid ha ka Subroto Cup 2024 da ka namjop bad mynta ka kynti ka la lah ban pynbam kput haduh 7 kol ïa ka International Schools Sports Organisation (ISSO) ha ka jingïalehkai na ka Group B ha Bangalore.
U Chanjib Chetry u ba la khyrwit hat-trick ha ka jingïalehkai ba nyngkong, sa shi sien u la kynjoh ïa ka hat trick hynrei mynta ka kynti u la ïoh ban thep haduh 4 kol mar wei. Kiwei pat ki kol ki la wan lyngba u Shanbok Basaiawmoit, Iaisynrop Syiemlieh bad na u Banteilang Malieh.
Kumban shu kdew, ka Nongjri Presbyterian Secondary School kaba na Ri-Bhoi, ka la ïoh ban mihkhmat ïa ka jylla sha katei ka kyrdan ïakhun dei hadien ba ka la rah namlahduh ha ka state-level Subroto Cup ha u bnai ba ladep.
Na ka thup jong ka Group B ki don san tylli ki kynhun, nalor ka Meghalaya bad ka kynhun na Sri Lanka, ki kynhun ki kynthup ïa ka Madhya Pradesh, International Schools Sports Organisation (ISSO) bad ka Dadra and Nagar Haveli & Daman and Diu (DNH&DD).
Da kane ka namjop, ka Meghalaya kan pynkhreh ban aireng khadduh ïa ka Dadra and Nagar Haveli & Daman and Diu (DNH&DD) ha ka por 10:30 baje mynstep mynta ka sngi.
