Nailar 22: U wei na ki khlur ïalehkai phutbol ba kynsai ha ka pyrthei, u Cristiano Ronaldo u la shim ïa ka sienjam kaba thymmai ha ka jingim jong u. Hadien ba u la pawnam ha ka phutbol palat ïa ka 20 snem kum u player, u Ronaldo u la shim pat da kawei ka lynti ha ka jingim kata ban long u nongpynmih video, da kaba pyllait ïa ka YouTube channel kaba la ai kyrteng ‘UR Cristiano’. Tang hadien shi kynta tam ba u la pyllait ïa kane ka YouTube channel, u Ronaldo u la pynpra ïa ka ‘world record’ ha kaba u la kylla long u briew ba stet tam ban kynjoh 1 million ki subscriber ka por kaba stet tam ha ka histori jong ka Youtube. Tang hadien katto katne kynta ba u la pyllait ïa ka video ba nyngkong, haduh 1.69 million ki subscriber ki la ïasoh bad kane ka Youtube channel kaba dang shu pyllait shen.
Ym tang kata, hapoh 24 kynta, ki subscriber ïa ka YouTube channel jong u ne u khlur ïalehkai ka ri Portugal ka la kynjoh haduh10 million, bad u la thaw sa kawei pat ka world record.
“Ka jingap ka la kut. Ka @YouTube channel ka la urlong mynta! SIUUUbscribe bad ïasoh bad Nga ha kane ka sienjam kaba thymmai,” ong u Ronaldo katkum ki kyntien ba u la pynbna ha ka Sngi Balang lyngba ki rynsan social media jong u.
Ka rekod barim ban kynjoh 10 million ki subscriber hapoh YouTube la bat shuwa da u Hamster Kombat, ha kaba ka channel ka la shimpor 7 sngi ban kynjoh sha u ne u mawmer. Katba ka channel u Ronaldo ka la tam palat 12 million ki subscriber tang ha ka shi sngi bad ka dang bteng ban kiew, ïa kaba ym pat ju ïohi mynno mynno.
Kam long satia kaba phylla ba u ne u snar thep kol ba la rangbah, u ba mih madan mynta ïa ka klob na Saudi Arabia, ka Al-Nassr, un dang jam shakhmat ban pynpra ïa kiba bun ki record ha ka YouTube ha kine ki sngi ban wan. U Ronaldo u dei u ba pawnam tam ha ka pyrthei haba nujor ïa kiwei, bad u don haduh 112.5 million ki nongbud (follower) ha ka rynsan X, 170 million hapoh ka Facebook bad haduh 636 million ha ka Instagram.