Shillong, Naiwieng 16: Ka Sohryngkham SC ka la ïoh ban khur ïa ka jingjop kaba ar jong ka ha ka lympung First Division Football League 2024 jong ka Shillong Sports Association da kaba pynjemkhnap ïa ka Umphyrnai SC da 5-1 kol ha ka jingïakhun kaba la long ha ka sngi Saitjaiñ (16 tarik Naiwieng) ha madan First Ground-SSA Stadium, Polo.
U Wallambha Kharpran (46′, 66′, 75′, 81′) u la long u namtam na bynta ka kynhun ha kane ka jingïalehkai ha kaba marwei u la khyrwit haduh saw tylli ki kol kiba baroh u la thep ha ka kylla miet.
Ka Sohryngkham ka la ïoh ban lamkhmat da tang shi kol na bynta ka kylla step, bad ïa kane la thep da u Pynshongdor Pyngrope (38’minit). U Wallambha u la pynkhih ïa ka kol kaba ar tang 1 minit mar ïa bteng ka kylla miet.
Ka shi kol na u Robertstar Malngiang (61’minit) ka la ai mynsiem shipor ïa ka Umphyrnai, hynrei kane kam shym la ktah ïa ka Sohryngkham naba u rangïalehkai ba kynsai jong ka ha kane ka jingïakhun, kata u Wallambha u la ïoh ban thep sa lai tylli ki kol ban pynthikna ïa ki lai point.
Hadien ka jingïaidlynti kaba khlem jop na ki san sien ïakhun (rem 2, ïakhaid 3), ka Sohryngkham mynta ka la jop ar sien bad kane ka la kyntiew ïa ka sha ka kyrdan ba saw ha ka miej.
Ka jingïalehkai First Division ha kane ka Lah Sngi U Blei (18 tarik Naiwieng) kan long hapdeng ka Pohkseh SC pyrshah ïa ka Malki SC ha ka por 2 shiteng mynsngi, ha madan SSA Ground, Polo.
