Khliehriat, Naiwieng 16: Ka lympung ïalehkai phutbol jong ka kyrdan 1st Division bala pynïaid da ka East Jaiñtia Hills District Football Association kaba la long ha ka sngi Saitjaiñ (16 tarik u Naiwieng) ha madan Artificial Turf, Diengshynrum, Khliehriat.
Haba phai sha ka jingïakhun Semi Final ba nyngkong ka kynhun ïalehkai jong ka Diengshynrum SC kala lah ban jop da 3-1 kol ïa ka Wahiajer Narpuh YSSC lyngba ka jingïashut Tie Breaker hadien ba ïakhaid mar 1-1 kol ha ka por ba la buh.
Ha ka jingïalehkai, dei ka Diengshynrum SC kaba la thep nyngkong lyngba u Fadical Pohshna (60’minit), hynrei ka Wahiajer Narpuh ka la ïoh pynïakhaid lyngba u Denzil Mukhim (69’), bad kane ka jingïakhaid ka la ïaineh haduh ba kut ka por.
Haba phai sha ka jingïakhun Semi Final kaba ar, ka Shilliang Umshong SC kala pynliem da 6-1 kol ïa ka Iatyllilang SC Hingaria.
Ha kane ka jingïakhun la sakhi ïa u Henjoymang Khongsai (8,53 & 64) uba la khyrwit da ka hat trik ban btin lynti ïa ka Shilliang Umshong sha ka final, katba u Lhunminthang Thauthang (43 & 70) u la pynkhih ar kol nangta kawei na u Besterly Ksih haka minit ba 58. Na ka liang ka Iatyllilang SC Hingaria ïa ka shikol la thep da u Western Pohshna haka minit ba 56.
Kumta kine ki ar kynhun, ka Diengshynrum SC bad ka Shilliang Umshong SC ki la ïoh ban rung sha ka Phainal jong ka 1st Division EJHDFA mynta u snem 2024 ha kaba kin ïaknieh ïa ka nam lahduh. Ha ka juh ka por kine ki ar kynhun kila ïoh ruh ban kiew kyrdan sha ka Super Division haka aiom ïalehkai ka ban sa wan (Next Season).
