Shillong, Naitung 21: Saw tylli ki kynhun ba kynthup ïa ka Lumpyngngad SC, Mawlynrei SC, Them Rangshken ACC bad ka Pynthorbah SC ki la ïoh ban khur jingjop ha ki jingïalehkai ka lympung Shillong Sports Association U-20 4th Division 2024 ba la long ha ka Sngi Saitjaiñ ha madan MFA bad SSA Ground, Polo.
Ha ka jingïakhun kaba nyngkong kaba la long ha MFA Ground, na ka daw ba ka Mawreng SC kam shym la lah ban wanpoi ha madan la rai namjop sha ka Lumpyngngad SC lyngba ka walk-over, kata ban jop da 3 kol ryngkat bad ki lai point.
Nangta ka Mawlynrei SC ka la lah ban pynliem noh da 3-1 kol ïa ka Golflink SC. Dei ka Golflink kaba la pynshongshit nyngkong ïa ka jingïakhun da kaba pynkhihjar tang hadien 3 minit ba la ïaid ka por na u Ribanshan Wahlang.
Hynrei kane ka jingkmen ka la neh shipor naba ka Mawlynrei SC ka la pynïakhaid shuwa ban kut ka kylla step na u Banjop Thabah (35+2 min) shuwa ba u Banteilang Sohlang (45min) bad u Banjop Dohling (70+5min) kin thep ïa ki kol ban pynthikna namjop.
Ha kawei pat ka jingïakhun, ka Pynthorbah SC ka la jop da ka said ïa ka Laitlulong SC da 3-2 kol ha ka jingïalehkai kaba itynnat.
Na ka liang ka Pynthorbah SC ki lai kol la pynkhih da u Rishan Nonghyndah (7 min), Jwier Kharkongor (10 min) bad u Raymond Kharkongor (34min).
Katba ka Laitlulong SC la thep da u Ontonas Nongsiej (63 min) bad ka kol ba la kum bakla thep hi da u Gilbert Kurbah (41 min).
Napdeng kine ki kynhun ba khur jingjop ha ka Sngi Saitjaiñ, ka Them Rangshken ACC ka dei ka kynhun kaba tyngshaiñ tam hadien ba ka la pynjemkhnap ïa ka Mawklot SC haduh 5 kol.
U Stambok Kurbah u la lam lynti ïa ka kynhun da kaba thep ar kol (6 bad 54 minit), katba u Rostar Thabah (18 min), u Gilbert Kurbah (20 min) bad u Ksanbor Warjri (59 min) ki la ïoh ban thep mar shi kol.
