SHILLONG, Naitung 22: Ka Pomlakrai SC ka la pynliem noh da 3-1 kol ïa ka Lummawbah SC hynne ka sngi Balang ha SSA Ground ha ka jingïalehkai Super 8 jong ka Group B ban pynskhem ïa ka jaka ha ka semi final jong ka SSA SRGT Third Division Football League 2026.
Hadien ba ka kylla step ka la kut khlem da don ba lah ban thep kol, ka Pomlakrai SC ka la sdang pynkhihjar nyngkong ha ka minit kaba 53 lyngba u Peacemaker Lyngdoh shuwa ba kan pynjlan ar shah ïa ka kol lamkhmat tang hadien ar minit lyngba u Vicky Kurkalang (55’).
Nangta u Vicky u la pynskhem ïa ka jingjop da kaba thep ïa ka kol kaba ar jong u bad kaba lai jong ka kynhun ha ka minit kaba 72.
Ka Lummawbah SC ka la ïohlad ban pynphai shi kol lyngba u Adelbert K. Shun ha ka minit kaba 77, hynrei ka por ka la dier palat ïa ka kynhun ba kan wanphai ha ka jingïalehkai.
Da kane ka jingjop, ka Pomlakrai SC ym tang ba ka la pynskhem ïa ka jaka jong ka ha ka semi final hynrei ka la pynthikna ruh ban kiew kyrdan sha ka lympung Second Division ha ka samoi ban wan.
