SHILLONG, Naitung 22: Ka sngi kaba ar jong ka lympung phutbol ‘State Level Subroto Mukherjee Cup Football Tournament 2026’ ka la sakhi ïa ka jingïalehkai kaba itynnad bad bun tylli ki kol ba la thep ha baroh lai tylli ki kyrdan ïakhun, kata ka Under-15 Boys, Under-17 Boys bad Under-17 Girls.
Ïa kane ka lympung la pynlong da ka Directorate of Sports & Youth Affairs ha SSA Stadium, MFA Turf bad Mawlai Madan Heh, kum ka rynsan ban sei madan ïa ki sap ïalehkai jong ki khynnah ka jylla.
Ha ka kyrdan ïalehkai Under-15 Boys ha SSA Stadium:
Ka Step by Step Secondary School (East Jaintia Hills) ka la mad ïa ka jingjop kaba shongkun da kaba pynliem noh ïa ka St. Claret Higher Secondary School (West Garo Hills) da 5-1. U Mewasolaki Rymbai u la thep ar kol, katba kiwei pat ki kol la thep da u Overwell Suchiang (24’), u Kyrshanlang Dkhar (46’), bad kawei ka own goal. Ka St. Claret ka la lah ban pynphai tang shi kol lyngba u Jerryphingko Marak (47’).
Ka North Liberty Hr. Sec. School (West Jaintia Hills) ka la ïaid shakhmat ban jop da 4-0 pyrshah ïa ka Anderson Hr. Sec. School (West Khasi Hills). U Meshan-I Syntem u la long u namtam da kaba thep ar kol (19′, 23′), katba u Ozil Langshiang (2′) bad u Kyrshanlang Chyrmang (20′) ki la thep mar kawei.
Ka Umpohliew Jingtip Hr. Sec. School (East Khasi Hills) ka la pynjemkhnap ïa ka Baghmara Hr. Sec. School (South Garo Hills) da kaba jop 6-0 kol. U Bomtius Dkhar u la lamkhmat da kaba thep ar kol (13′, 43′), ryngkat ka jingnoh synñiang na u Roniki Kharshandi (14′), Komasson Lyngdoh (22′), Nangteimanbha Syiemlieh (25′), bad u Hamebanjop Langstieh (38′) kiba la thep mar kawei.
Ka Little Star Hr. Sec. School (Eastern West Khasi Hills) bad ka Mangsang Hr. Sec. School (East Garo Hills) ki la ïakhaid mar 2-2 kol. Ka Little Star ka la pynkhihjar lyngba u Davidson Lyngdoh Marshilong (36′) bad u Revealstar SLJ Kharbhih (43′), katba ka Mangsang ka la thep na u Tengsuang T. Sangma (7′) bad u Rakrim N. Marak (17′).
Haba phai sha ka kyrdan Under-17 Boys ha MFA Turf, Polo:
Ka Bajengdoba Hr. Sec. School (North Garo Hills) ka la jop da 4-3 ïa ka Amwi Hr. Sec. School (West Jaintia Hills). U Chukam R. Marak u la thep ar kol (22′, 52′), katba u Mithu D Sangma (6′) bad u Gipsang M. Marak (21′) ki la ïoh mar kawei. Ka Amwi ka la ïakhun tyngeh lyngba ki kol na u Clifford Buam (16′, 51′) bad u Austinly Buam (45′).
Ka Wapung Sec. School (East Jaintia Hills) ka la jop da 4-0 ïa ka Okkapara Sec. School (South West Garo Hills) lyngba ka hat trick jong u Jeffarson Phawa (42′, 52′, 70′), bad ka shi kol jong u Lyonel (60′).
Nangta ka Myngken Christian Hr. Sec. School (Ri-Bhoi) ka la wanrah ïa ka jingïalehkai kaba khlaiñ ban pynliem ïa ka Little Star Hr. Sec. School (Eastern West Khasi Hills) da 5-1. U Chanjib Chetry u la pynkhihjar haduh saw sien (26′, 39′, 47′, 51′), ryngkat kawei na u Prosperwell Ryntong (44′). U Kishan Wahlang (21′) u la thep ïa ka shi kol jong ka Little Star.
Ka Dapboklang Giri Memorial Sec. School (West Khasi Hills) ka la jop suk da 6-0 ïa ka Balang Mawlangwir Hr. Sec. School (South West Khasi Hills). U Iohborlang Lyngkhoi u la pynkhihjar saw sien (7′, 28′, 35′, 43′), katba u Jonalius Khardewsaw (13′) bad u Shemphang Iawphniaw (65′) ki la thep mar kawei.
Ha ka kyrdan Under-17 Girls ba la pynlong ha Madan Heh, Mawlai:
Ka North Liberty Hr. Sec. School (West Jaintia Hills) ka la pynbam kput haduh 12-0 ïa ka St. Claret Hr. Sec. School (South West Garo Hills). Ka Elizabeth Thianglai (15′, 30′, 58′) bad ka Baiarbha Nongrum (35′, 41′, 59′) ki la ïoh ban thep hat trick. Ka Receive Ksoo (11′, 38′) bad ka Peacefully Pohplet (25′, 50′) ki la pynkhihjar mar ar sien, katba ka Saphika Pyrtuh (24′) bad ka Virginia Pyrtuh (26′) ki la bynrap mar kawei.
Ka Lotus Sec. School (East Jaintia Hills) bad ka Rangthong Christian Hr. Sec. School (South West Khasi Hills) ki la pynkut da kaba ïakhaid khlem kol.
Ka Lurmangkara Sec. School (West Khasi Hills) ki la mad ïa ka jingjop da 4-0 pyrshah ïa ka Montford Sec. School (West Garo Hills). Ka Natasha Kharjahrin ka la lamkhmat da kaba thep hat trick (6′, 29′, 53′), lem bad ka kol jong ka Evanisha Kharjahrin (18′).
Nangta ka Tyrsad Hr. Sec. School (East Khasi Hills) ka la pynjemkhnap ïa ka Rangku Memorial Girls Hr. Sec. School (South Garo Hills) da ka jingjop kaba da 9-0 kol. Ka Ha-I-sha Myrthong ka la ïoh hat trick (2′, 11′, 38′), katba ka Labianghun Rani (7′, 26′) bad ka Wanrihun Kharnaior (47′, 52′) ki la thep mar ar kol. Kiwei pat ki kol la thep da ka Deiphibakor Lyting (39′) bad ka Vanessa Phiba Mawthoh (43′).
Ki jingïalehkai group stage kin kut ha kane ka sngi Palei, bad hadien kane yn sa tip ïa ki kynhun kiba rung sha ka semi-final kaba la buh ban long ha ka 24 tarik Naitung.
