Shillong, Nailar 09: Ka Smit SC, Nongmensong SC bad ka Mawryngkneng ki la jop ïa la ki jong ki jingïalehkai jong ka lympung Shillong Sports Association Second Division Football League 2026, kiba la long ha ka sngi Saitjaiñ ha Polo.
Ka Smit ka la pynliem noh ïa ka Mawkriah West SC da 4-1 kol, katba ka Nongmensong ka la pynjemkhnap da 5-0 kol ïa ka Umphrup SC, nangta ka Mawryngkneng ka la jop da tang 1-0 kol ïa ka Umlyngka.
Ha SSA Stadium ka Smit ka la pynkhihjar lyngba u Apburom Nongrum (5′, 36′) uba la thep ar kol, nangta u Mangkyrpang S Nongdhar (29′) bad u Andystar Kharsati (90’+6) ki la thep mar shi kol. Ka shi kol jong ka Mawkriah West la thep da u Calbessius Pathaw (73′).
Ha MFA Ground, u Wanpynsuk Shadap (15′, 27′, 62′) u la lamkhmat da kaba thep hat-trick na ka bynta ka Nongmensong katba u Binstarson Lyngdoh (75′) bad u Starding Lyngdoh (81′) ki la bynrap mar kawei ka kol.
Ka jingïalehkai kaba khatduh ha SSA Stadium la sakhi tang kawei ka kol na u Iohbor Mukhim (72′) kaba la biang ïa ka Mawryngkneng ban mad ïa ka jingjop pyrshah ïa ka Umlyngka SC.
Ki lai tylli ki jingïalehkai ha kane ka sngi Nyngkong:
Jaka: SSA Stadium:
Por 1 baje mynsngi
Sohiong vs Tynring
Jaka: MFA Ground:
Por 1 baje mynsngi
Jongksha vs Lawsohtun
Jaka: SSA Stadium:
Por 4 baje nohphai sngi
Sohryngkham vs Umrynjah