Shillong, Nailar 09: Ka Shillong Lajong FC ka la mad ïa ka jingjop da 5-0 kol pyrshah ïa ka Mumbay FC ha ka Group E jong ka lympung 135th IndianOil Durand Cup, kaba la long ha Jawaharlal Nehru Stadium ha ka sngi Saitjaiñ, 08 tarik Nailar, 2026, ka jingjop kaba la nang pynskhem shuh shuh ïa ka jingkyrmen jong ki ban poi sha ka quarter-final.
U Everbrightson Sana u la lamkhmat ïa ka kynhun da kaba thep ar kol, katba u Abhay Gurung, u Tremiki Lamurong bad u Figo Syndai ki la bynrap mar kawei ka kol ban pynjemkhnap ïa ka liang pyrshah kaba na Mumbai hakhmat ki paid nongkyrshan kiba bun.
Kane ka jingjop ka la rah ïa ka Shillong Lajong sha khlieh duh jong ka Group E da kaba kamai 6 point da kaba jop ïa baroh ar tylli ki jingïakhun jong ka. Ka Langsning FC ka shong ha ka kyrdan ba ar da 4 point, katba ka Nongkseh SS&CC ha ka kyrdan ba lai da 1 point. Ka Mumbay FC, ka bym pat ïoh ban kamai poiñ na ki ar tylli ki jingïakhun haduh mynta, ka dang sah ha trai duh jong ka Group.
Ka Lajong ka la ïoh ban tehlakam bun shah ïa ka jingïalehkai ha ka kylla step, ha kaba ka Mumbay ka la shem jingeh ban khanglad ïa ka jingpyrshang kaba khlem sangeh jong ka Lajong.
Hapdeng ka jingïakhun, ka Lajong ka la ïoh ban pyrshang bun sien sha kol hynrei kim shym la long kiba seisoh, dei tad ynda la jam sha ki minit pynjlan ba ka Lajong ka la ïoh ban thep syndon ar tylli ki kol ban ïoh lamkhmat ïa ka jingïalehkai.
Kaba nyngkong ka la wan lyngba u Abhay Gurung (45+1’) bud sa kaba ar na u Tremiki Lamurong (45+3’).
Ha ka kylla miet, ka Lajong ka la ïalehkai kumjuh ka rukom da kaba ïai pynbor ban tur shakhmat khlem sangeh, bad ki la ïoh biang ban pynkhihjar ha ka minit kaba 52 lyngba u Everbrighton. Nangta u la bynrap sa kawei ka kol ha ka minit kaba 64, kaba la nang pynthikna khlem jingartatien ban khur pura ïa ki lai point.
Ha ka 88 minit shuwa ba ka por kan poi sha kaba kut u Figo Syndai u la thep ïa ka kol kaba san hadien ba ïohpdiang ïa ka bol pashat kaba thikna na u Manbhakupar Iawphniaw.
Na ka bynta ka Shillong Lajong, ka jingjop ka pynjlan ïa ka jingsdang kaba paka bha ha ka jingïalehkai bad ka buh ïa ka ha ka kyrdan kaba skhem jong ka Group E ryngkat bad kawei ka jingïakhun kaba dang sah.
