Shillong, Risaw 30: Ka resol jong ar tylli ki jingïakhun ka lympung SSA 2nd DIVISION Football League 2023 kaba la long hynne ka Lah Sngi U Blei (30 tarik Risaw 2023) ha madan1st Ground SSA Stadium ka la jam sha kaba kut ha kaba ka Sohryngkham SC bad ka Jongksha SC ki la khur namjop.
Haba bishar ïa ka jingïalehkai kaba nyngkong ba la sdang ha ka por 11:30 baje mynstep hapdeng ka Mawtawar SC pyrshah ïa ka Sohryngkham SC, ka jingïakhun ka la long kaba ïakhaid bad kaba itynnat bad ka jingïathep kol ka la wan na baroh arliang mamla, hynrei dei ka Sohryngkham SC kaba la thep tam ban khur ïa ka namjop.
Ka Mawtawar SC ka la ïoh ban pynkhihjar nyngkong tang mar ïa sdang ka jingïakhun na u Fredrick Lyngdoh (1 minit). Hynrei ka Sohryngkham SC ka la ïoh ban pynphai lyngba u Wanlambha kharpran ha ka minit ba 37 shuwa ba u Iarbok Kshiar un thep ïa ka kol kaba ar ha ka 47 minit.
Kumba katto katne por, ka Sohryngkham SC ka la ïai bteng ban ñion shakhmat bad dei ha ka minit ba 53 ba u Wanlambha kharpran u la thep biang sa shi kol ban pynlong ïa ka kynhun ban lamkhmat da 1-3 kol ha kane ka jingïalehkai.
Shuwa ban sa kut ka por, u Ricky Chyne u la ïoh ban pynphai shi kol ha ka minit ba 75 na bynta ka Mawtawar SC hynrei ka por ka lyngkot eh ïa ka kynhun bad ka la shahrem da 2-3 kol.
Ha ka jingïakhun kaba ar pat, la sdang ha ka por 1:30 mynsngi hapdeng ka Laitlyngkot SC pyrshah ïa ka Jongksha SC, bad ka jingïakhun ka la jam sha kaba kut ha kaba ka Jongksha SC ka la pynjemkhnap da 3 kol ïa ka Laitlyngkot SC.
Ka Jongksha SC ka la ïoh ban pynkhihjar nyngkong lyngba u Mangiarkam kshiar (36 minit), nangta bud sa ka kol na u Franky Nongspung ha ka minit ba 69 bad khadduh na u Jopborlang Khongsngi ha ka 76 minit.
La pyntip ba ka jingïakhun semi final ba nyngkong jong ka SSA 4th DIVISION Football League 2023 kan sdang mynta ka sngi (31 tarik Risaw 2023) por 1:45 mynsngi ha 1st Ground SSA Stadium, bad ka jingïakhun kan long hapdeng ka Lamlynti FC pyrshah ïa ka Kharang SC.
