Shillong, Risaw 17 : Ka Mawlai ka la bteng ban khur ïa ka nam jop ban pynjan ïalade sha ka lynti ban poi syndon sha ka nam lahduh jong ka Shillong Premier League mynta ka samoi hadien ba ka la lah ban pynliem noh ïa ka Nongrim Hills da 3-0 kol ha ka jingïakhun kaba long ha kane ka sngi Thohdieng ha madan SSA Stadium First Ground, Polo.
Ïa ki kol jong ka Mawlai ha kane ka sngi la ïoh ban thep da u Robertson Khongriah uba la ïoh ban pynkhih jar arsien kata ha ka minit kaba 54 bad 84 jongka kylla miet katba ïa ka shi kol pat la ïoh ban thep da u Banraplang Pyngrope ha ka minit kaba 76. Kine baroh lai tylli ki kol ki dei ha ka kylla miet hadien ba ka jingïakhun ha ka kylla step ka la kut noh da ka jingïakhaid khlem da don mano mano ruh ba ïoh ban thep kol.
Da kane ka jingjop jong ka Mawlai kam shym la don satia kano kano ka jingkylla ha ka miej khein point watla ka Mawlai ka la kiew sha ka 18 point bad sah sa shi sien ïakhun. Katba ka Shillong Lajong pat kan mih madan ha kane ka sngi Saitjain. Kumta lada jia ba ka lah ban pynliem noh ïa ka Nangkiew Irat ka SLFC ka lah ban khur ïa ka nam lahduh ha ka sien kaba hynriew ïa ka Shillong Premier League.
Kumba ka long hi, dei tang ka jingïakhaid lane ka jingshah rem kaban rai ïa ka Mawlai ha ka jingïakhun ba khatduh pyrshah ïa ka Rangdajied United ha ka sngi Nyngkong.
Ka Shillong Lajong ruh ka don mynta 18 point ryngkat bad ka Mawlai hynrei ha kane ka kynti ka Lajong ka la kham don ka jingkyrmen namar ka la dep ban pynliem teng ïa ka Mawlai da 4-3 kol ha ka 01tarik Risaw.
Kaba kham sngew shongshit ka long ba ka Langsning haduh mynta ka dang lamkhmat ïa ka miej khein point da ki 20 point bad mynta ka shu long ka nongpeitkai ïa ki jingïakhun kiba dang sah khamtam haba ïadei eh ïa ka Shillong Lajong bad ka Mawlai.
Kumta, ka jingïakhun hapdeng ka Nangkiew Irat bad ka Shillong Lajong mynta ka janmiet sngi Saitjain kan dei kaba itynnad bha namar hangne kan dei ruh ka rai kaba khatduh ïa ka ha kane ka samoi mynta u snem.
