Shillong, Nailur 17: Ka Rangdajied United ka la sei madan ïa ka jingïalehkai kaba kyrpang ban jop da 2-1 pyrshah ïa ka Nangkiew Irat ha ka Shillong Premier League 2026 hynne ka sngi Palei ha madan First Ground-SSA Stadium.
U Mebannangkiew Thabah (18’) bad u Micky Marwein (81’) ki la pynkhihjar na ka bynta ka Rangdajied bad u Ronaldkydon L Nonglait (32’) u la thep ïa ka shi kol na ka bynta ka Nangkiew Irat.
Da kane ka resol ka RUFC mynta ka la jop ar sien lynter ki jingïalehkai hadien ka jingsdang kaba tlot ïa ka samoi kaba la sakhi ïa ka kynhun ban ïaid khlem jop ha ki lai tylli ki jingïalehkai ba nyngkong. Kane ka jingjop ka la pynlong ïa ka RUFC ban kiew na ka kyrdan ba phra sha ka kyrdan kaba hynriew, ha kaba ka Nangkiew Irat ka la hiar sha ka kyrdan kaba hynñiew bad ka Meghalaya Police ka la hiar sha ka kyrdan kaba phra. Baroh lai tylli ryngkat bad ka Nongkseh kaba don ha ka kyrdan ba san, ki ïaryngkat mar 7 point, hynrei la pynïakhlad ïa ki da ka jingïapher kol bad ka jingbun kol.
Ka jingïalehkai ka long kaba itynnad bha bad ka Rangdajied ka la pynpaw ba ka kham khlaiñ ban ïa ki jingïalehkai ba ladep, da ka rukom pashat bol kaba thikna, ka jinglah ban tehlakam ïa ka bol bad ka jingshim rai.
U Gideon Mukhim u la long uba kongsan ha ka liang kamon bad u la ïarap ban pashat ïa ka bol na ka bynta ka kol ba nyngkong, kaba la thep da u Mebannangkiew.
Ha kawei pat ka liang, ka Nangkiew Irat ka la ïoh ïa ka kabu ksiar ban pynïakhaid hadien san minit hadien ba u nongap kol ka Rangdajied u Meshan Banjop Sumer, u la pynhap ïa ka bol kaba u la dei ban bat. Hynrei ka Nangkiew kam shym la lah ban shim kabu ïa kane ka jingbakla u rangap kol.
Ka Nangkiew Irat ka la ïoh ban pynïakhaid lyngba u Ronaldkydon kaba pynlong ïa kine ki arliang mamla ban jam sha ka por shongthait da mar 1-1 kol.
Haba wanphai sha ka kylla miet, ka jingïakhun ka la neh slem khlem kol tad haduh ka minit kaba 81, ha kaba u Micky u la thep ïa ka namtam na ka bynta ka RUFC ban khur ïa ka jingjop kaba ar lynter.
Mynta ka sngi, ka Laitkor kaba wan ha ka kyrdan ba khyndai, kan aireng pyrshah ïa ka Sawmer kaba wan kyrdan ba saw, ha ka por 3 baje nohphai sngi. Ka Laitkor ka donkam ïa ka jingjop ban ïoh jingkyrmen ban lait na ka jingshah pynhiar kyrdan.
