Shillong, Nailar 24: Wat hadien ba shah lamkhmat ar sien ka Meghalaya Police ka la lah ba kan wanphai da kaba tyngeh ban khur ïa ka jingjop da 4-2 pyrshah ïa ka Sawmer ha ka jingïakhun kaba itynnad bha jong ka Shillong Premier League 2026 hynne ka sngi Nyngkong ha SSA Stadium.
U Diego Khyriem (2’) bad u Banteilang Lyngdoh (11’) ki la pynkhihjar na ka bynta ka Sawmer katba u Pynshaidor Nongrang (5’), u Rapborlang Marwein (15’), u Bikram Chettri (67’) bad u Pynshailang L Lyngkhoi (84’) ki la thep na ka bynta ka MLP.
Baroh arliang ki la jam sha kane ka jingïakhun da kaba jop ïa ki jingïalehkai ba dang shen, ka Sawmer ka la jop pyrshah ïa ka Rangdajied United ha ka 04 tarik Nailar bad ka MLP ka la jop pyrshah ïa ka Langsning ha ka 18 tarik Nailar.
Kam shym la don kano kano ka jingkylla ha ka kynhun ba sdang jong ka MLP kaba la jop ïa ka jingïalehkai ba dang shen. Ha kawei ka liang, ka Sawmer ka la wanrah lai tylli ki jingkylla da kaba sdang ïa u Diego A Khyriem, Enestar Malngiang bad u Michaelson Kurbah ha jaka jong u Oresterwell Langshiang, Andy Z Mawthoh bad u Wanshanlang Dkhar.
Ka jingïakhun ka la long kaba jur bha naduh kaba sdang, bad la sakhi haduh 4 tylli ki kol ba la thep tang hapoh 15 minit. U Diego u la ktah mardor ïa ka jingïakhun na ka bynta ka Sawmer, da kaba thep ïa kawei na ki kol ba stet tam jong ka samoi. Hynrei kane kam shym la neh slem, namar ba u Pynshaidor u la pynïakhaid ïa ka MLP tang hadien 3 minit ba ka la shah thep.
Ka Sawmer ka la ïoh ba kan lamkhmat biang ïa ka jingïalehkai ha ka minit kaba 11 jong ka kylla step lyngba ka kol jong u Banteilang. Khlem da pynslem ka MLP ruh ka la jubab mardor ban pynïakhaid ha ka minit kaba 15 na u Rapborlang.
Hadien kane, ka jingïalehkai ka la sdang ban jaijai, watla u Banteilang u la pyrkhat ba u la ïoh pynkhihjar biang ha ka minit kaba 36 hynrei u assistant referee u la kyntait ïa ka namar ka offside.
Ha ka kylla miet, u rangapkol ka Sawmer u Pyrshangbanbha Dkhar u la khanglad ïa katto katne ki kabu jong ka liang pyrshah, hynrei um shym la lah ban leh ei ei ban khanglad ïa ka jingpyrshang jong u Bikram, uba la pynkhihjar da ka khlieh na ka bol pashat korner kick.
Nangta ka MLP ka la pynskhem ïa ka jingjop da kaba thep ïa ka kol kaba saw ha ka minit kaba 84 lyngba u Pynshailang.
Ka jingïalehkai ha kane ka sngi Hatmajai kan long hapdeng ka Laitkor pyrshah ïa ka Nangkiew Irat ha ka por 3:40 baje nohphai sngi. Ka Laitkor ka la kamai 3 point naki ar tylli ki jingïakhun, katba ka Nangkiew Irat haduh mynta ka la ïoh ban khur tang 1 point bad ka dang ïakhun ban khur ïa ka jingjop kaba nyngkong ha kane ka samoi.
