Jowai, Nailar 24: Ka Ryntihlang SC Brishyrnot ka la jop ïa la ka jong ka jingïalehkai haka lympung phutbol 2nd Division 2026 League Stage bala pynïaid daka East Jaiñtia Hills District Football Association (EJHDFA), hynne ka sngi Nyngkong, 24 tarik u Nailar, 2026 ha madan Artificial Ground Diengshynrum, Khliehriat.
Ki ar tylli kiwei pat ki jingïalehkai ha kane ka sngi ki la kut ha ka jingïakhaid.
Haba phai sha ka jingïakhun ba nyngkong, la sakhi ïa ka Ryntihlang SC Brishyrnot kaba la pynliem noh da 2-1 kol ïa ka Rangad SCSC. Baroh ki kol la thep ha ka kylla step, ha kaba ka Ryntihlang SC Brishyrnot ka la pynkhihjar lyngba u Hamedabiang Bamon (33’) bud sa ka kol ba ar na u Yomioo Syih (35’) shuwa ba ka Rangad SCSC kan pynphai kawei lyngba u Sunday Tariang (40+1’) shuwa ban jam sha ka por shongthait.
Haka jingïakhun kaba ar ka hapdeng ka Umlyngsha YSSC bad ka Khliehriat West FC kila ïakhaid da mar ar kol (2-2). Baroh arliang ki la ïoh ban lamkhmat markylliang shuwa ba ka jingïalehkai kan poi sha ka jingïakhaid, ha kaba ka Khliehriat West ka la thep nyngkong lyngba u Owenson Malang (13’) hynrei ka Umlyngsha YSSC ka la pynïakhaid na u One Enjoy Dkhar (40+2’) shuwa ban jam sha ka por shongthait.
Nangta ka Umlyngsha ka la ïoh ba kan lamkhmat shipor lyngba u Kamni Rupsi (43’) kaba la shah pynïakhaid noh ha u Niki o Nongtdu (48’) na ka bynta ka Khliehriat West.
Haka jingïakhun kaba lai ruh ki ar kynhun hapdeng ka Iapmala United FC bad ka SWO Moosianglamare Old SC kila ïakhaid da mar lai kol (3-3). Ka Iapmala United FC ka la pynkhihjar lyngba u Arly Lamo (9’), u Iaslang Lamo (46’) bad u Shining Rymbai (74’), katba ka SWO Moosianglamare Old SC ka la thep lyngba u Evening Lapasam (22’), u Premio Muksor (38’) bad u Pyniar Pusein (55’).
