Shillong, Rymphang 09 : U Raymond Johny Nongrum uba dei uwei u samla ïalehkai MMA ka Jylla u la ïathuh ba u la ïoh ïa kawei ka kabu ksiar ban ïasoi soskular bad ka Upgrade Marketing kaba don ïa ka shlem treikam ha Los Angeles, USA kaba la wan shakhmat ban ïarap ban btinlynti ïa u ban rung sha ka rynsan ïakhun UFC ha USA.
U Raymond haba ïakren bad ki nongthoh khubor ha ka sngi Palei ha Shillong Press Club u la ïathuh ba ka soskular bad ka Upgrade Marketing ka long na ka bynta shi snem ha kaba u don pat ki ri kiba u donkam ban pynkhreh ban pynjanai ïalade hashwa ba un ïoh ban leit shapoh USA.
“Ka thong ba hakhmat jong nga mynta ka long ba nga hap ban ïakhun ïa ki katto katne ki jingïakob ha ki kyrdan ba kham heh (Pro Level) naduh ka AFC, ka jingïakhun ha Netherlands, South Africa, Malaysia bad ka jingshah khot sngewbha sha ka jingïakhun ha Singapore. Ha kaba ïadei bad kine ki jingïakhun, u Bah Raymond u la ïathuh ba u dang don hapdeng ka jingïakren na ka bynta ka bai leit bai wan. “Mynta nga dang ïapynbeit ïa ka jingsiew jong ka bai leit bai wan bad kiwei kiwei ki jingdonkam,” la ong u Bah Raymond.
Lada jia ba u Raymond u jop ïa ki lai tylli na kitei ki jingïakhun ka jingkhang ïa u kan plie na ka bynta ka jingïakhun UFC sha USA. “Hynrei haduh mynta na nga dang hap ban buria na la ka jong ka pla khnang ban poi sha katei ka thong, bad nga kyrpad ïa ki paidbah ba phin noh synñiang lem khnang ba ngan lah ban poi sha katei ka thong,” ong u Raymond Johny Kurbah uba la mihkhmat ruh ïa ka ri India ha kawei na ki rynsan ïakhun kaba la long ha South Africa ha u 2016.
