Shillong, Nailur 08 : Hadien ba ka Shillong Lajong Football Club ka la wanrah haduh lai ngut ki rangïalehkai bar ri na ka bynta ka samoi lehkai 2022-23 jong kane ka I-League, kane ka kynhun ka la phaikhmat bad pynbna ba ka ladep ban soi pura ïa u wei na ki rangkynsai ba napoh ka jylla,u Damaitphang Lyngdoh, u rangïalehkai ba dang 19-snem, ba ïalehkai kum u midfield.
U Damaitphang Lyngdoh u dei ba shong ba sah ha Umlyngka kaba ha East Khasi Hills. U Lyngdoh u la dep ban soi ïa ka kontrak kaba ar snem ha kane ka jingwanphai ka jong u bad kane ka kynhun, hadien ka jingseisoh ha ka por ba u mih madan na ka Bengaluru FC.
U Damaitphang Lyngdoh u dei u rangïalehkai midfield ba kynsai bad u ba don ïa ka sap kaba kyrpang ha madan. U dei u rangïalehkai u ba la shemphang hadien ba u la ïoh ban mih madan ha ki lympung kiba heh kum ka Indian Super League (ISL), ka AFC Cup Qualifiers, Durand Cup, bad kiwei de ki jait tournament.
Haba phai khyndiat ka por jong u bad ka Bengaluru FC, u Lyngdoh u la don bynta ban rah haduh ar sien lynter ïa ka burom jong ka Reliance Foundation Development League ha ka samoi lehkai 2021/2022 bad ruh ha ka samoi 2022/2023.
Ka jingtrei shitom bad ka sap lehkai kaba tbit ka jong u ka la pynïoh ïa u ban khur ïa ka khusnam Upcoming Player of the Season jong ka 2020/2021″ kaba dei bynta jong ka BFC Club Awards.
Ka Shillong Lajong FC ka pdiang burom ïa u Damaitphang Lyngdoh sha ka klob bad pynpaw ba ka jingwan ïasoh ka jong u kan dang pynkhlaiñ shuh shuh ïa ka kynhun khamtam ha ki bynta midfield bad ruh ban sa kyntiew ïa ka klob ha kine ki snem ban wan.
Kumban shu pynkynmaw ka Shillong Lajong ka la soi haduh lai ngut ki rangïalehkai bar ri ban pynkhreh ïa ka samoi 2023-24 jong ka I-League, kiba kynthup ïa u Daniel Goncalves (Brazil), u El Hadji Abdou Samb (Senegal) bad dang shen u Renan Poulino De Souza (Brazil).
U Damaitphang Lyngdoh u dei u rangïalehkai ba saw hadien kitei ki lai ngut ba ka Shillong Lajong FC kan soi na ka bynta ka samoi lehkai ban wan jong ka I-League.
