Shillong, Nailur 08: Hynne ka Sngi Thohdieng ka Shooting Association of Meghalaya ka la ïoh ban pynlong ïa ka prokram ai jinghikai rynsan ïakopsiat (sports Shooting) na ka bynta ki khynnah ba duna ha ka bor ïohsngew, ha Bethany Society, Veronica Lane, Laitumkhrah, kaba la sdang naduh ka por 10 baje mynstep haduh 12.30 mynsngi.
Ha kane ka prokram ki la don haduh 19 ngut ki khynnah kiba la wan ban sakhi ïa kane ka prokram jingpyni ïakopsiat ha ryngkat bad ki 4 ngut ki nongïakopsiat jong ka SAM. Ha kaba la sakhi ïa 9 ngut napdeng jong ki kiba pynpaw ïa ka sap watla ka dei ka sien kaba nyngkong ba kin shimbynta ha ka indoor shooting sport.
Ha kane ka prokram na ka liang jong u President Shooting Association of Meghalaya, u Bah John F Kharshiing, u la ong ba ka SAM ka don mynta ha ka lynti ban pynbit pynbiang ïa ki khynnah kiba don jingduna dkhot met lyngba ki jinghikai ban pyntbit ïa ki bad ban ïoh ka jingmynjur na ki skul bad ki Principal bad ruh ka lad ban ïoh shim bynta ha ka Para events bad sports.
Kane ka dei ka sien kaba nyngkong ba ka Shooting Association of Meghalaya kan shim ïa ka synjam ban phaikhmat sha ki khynnah ba don jingduna. Bad na ka liang jong kane ka synjuk ka la pynpaw ba ka khmih lynti ban ïoh ïa ki nongïakop siat kiba tbit la ki dei ki khynnah ba don jingduna.
