Shillong, Kyllalyngkot, 17: Ka Voice of the People Party (VPP) ha ka sngi Balang ka la pynbna paidbah ban pynlong ïa ka jingïakhih da kaba shong kyllaiñ myngngor hakhmat ka Meghalaya Secretariat ha ka 19 tarik mynta u bnai naduh ka por 10 baje mynstep haduh ka por 4:30 baje janmiet halor ka jingbym sngap jong ka Sorkar MDA hapoh ka jingïalam jong u Conrad Sangma kum u Myntri Rangbah ban jubab ïa ka jingdawa jong ka VPP na ka bynta ban thungkam biang ïa ki ophisar ba la shah weng hapoh ka ophis Lok Ayukta.
“Ka jingïakhih kan bteng biang ha ka lah sngi u Blei ka 22 tarik mynta u bnai lada ka Sorkar kam sngap ïa ka jingdawa. Ka jingwengkam ai ki ophisar kam dei tang ka jingleh bymhok bad ka jingibeiñ ïa ki hynrei ïa ka jylla baroh kawei bad namarkata, ka dei ka kamram jong uwei pa uwei u nongshong shnong ban ïasnohkti lang ha ka jingïakhih bad ban pyndem khohsiew ïa kane ka Sorkar,” ong u Nongaiktien ka VPP u Dr. Batskhem Myrboh.
“Ka party ka kyrpad ïa baroh kiba ïashim bynta ha ka jingïakhih ba kin kiar ban shim ïa kino kino ki sienjam kiba pynkheiñ ïa ka shongsuk shongsaiñ. Lada don kino kino kiba donkti ha ka jingpynthud ïa ka shongsuk shongsaiñ, u/ka kin hap ban shim hi halade ïa ka jingkitkhlieh,” maham ka VPP.
