Shillong, Jymmang 13: U Myntri Rangbah ka jylla u Conrad K Sangma ha ka sngi Thohdieng u la pynpaw ïa ka jingsngewnguh ïa ka High Court (HC) of Meghalaya kaba la ai jingïaroh ha ka sngi Palei ïa ka sienjam kaba ka sorkar jylla ka la shim ban wanrah ïa 30 tylli ki bos na bynta ki khynnah skul kum shi bynta ban weng ïa ka jingkhapngiah ka sor Shillong.
“Kum u myntri jong kane ka tnat, nga sngew kmen ban ïohi ba ka High Court ka ïaroh ïa ka sienjam kaba ngi shim na bynta ban wanrah ïa ki bos 30 na bynta ki khynnah skul,” u la ong.
“Ki bos skul kham bunsien ym ju kham pyndonkam bha, hynrei ha ka thaiñ Northeast ka sorkar ha ka jylla jong ngi ka dei kaba nyngkong eh ban wanrah da ki bos kamai ha ki jaka sor. Da ka jingdon ki GPS tracking, ki CCTV camera, bad ki nongpynïaid kiba tbit ngi kyrmen skhem ba kan weng ïa ka jingdheng kali bad ngi kular ïa ki kmie ki kpa ba kin ym sngewtieng lada ki khun jong ki kin pyndonkam da kine ki bos,” u la bynrap.
Lah ban kdew ba ha ka sngi Palei ka High Court ka la kubur ïa ka kaiphod ba ka sorkar jylla ka la aiti sha ka kashari na bynta ban weng ïa ka jingdheng kali jong ka nongbah Shillong kata ka dei beit ban wanrah noh da ki bos skul ban leit shaw bad leit on ïa ki khynnah skul ha jaka ba kin pydonkam da ka kali shimet.
Lah ban sakhi ba haba shim bishar ïa kane u Chief Justice u la ai jingïaroh ruh ïa ka sorkar ha kaba ïadei bad ki sienjam ba ka shim, “ngi pyrto ïa ki kam ka sorkar haba dawa ka kam bad kham bunsien hi ngi sakhi ba ka don ka jingkynthoh hynrei haba dawa ka kam ngi ïaroh bad haba dawa ban kynthoh ngi kynthoh bad sngewbha pynpoi ïa kane ka khubor sha ka sorkar ba ngi pyrto ïa ka sienjam ka sorkar,” ong u Chief Justice ïa u K Khan u muktiar ka sorkar jylla.
