Nongstoiñ, Ïaiong, 28: Ki nongshong shnong ka Thamah ki la phah ka khubor sngew nguh eh ïa ka HYC West Khasi Hills District khamtam ïa u President Bah Lumlang Kharsyiemlieh, namar ka jinglong la kloi ban ïarap lem ïa ka jingud jingnam ki nongshong shnong halor ka jingbym biang ka bording.
Kitei ki nongshong shnong ki la ïathuh ba kumba 10 ne 11 Ïing ei ei ha ka snem 2021-22, kata hadien ba ki la aplai ïa ka BPL light, ka la poi ka bill bad kham hadien ka la kylla APL light bad ka bill ka la poi haduh kumba 16000, 20000, 24000 shaneng.
Kane ka bill ba da ki phew hajar la pynjynjar ïa ki paidbah nongshong shnong nalor ba ki dei tang ki nongrep bad nongbylla. Kumta ha ki khyndiat bnai ki la leit kyrpad ïa ka HYC Umsaw area Unit bad ka HYC West Khasi Hills ban tuklar lem halor kane.
Ka seng ruh mar mar hapoh ka jingïalam u Bah Lumlang Kharsyiemlieh ryngkat ka Umsaw area unit bad ki Paitbah ka shnong Thamah ki la leit ïakynduh ïa u SDO Bah Mawblei u ba dei peit ha kata ka por.
Hadien ka jingkyrpad bad ïarap pynshai, ki nongïalam HYC ki ong kane ka jingheh ka bill ki, ka dei namar ba ki meter ki duh bad la shu antad da ki nongtrei ka MePDCL. Kumta ka office ka la phah bujli ïa ki meter bad kheiñ bha ïa ka Bill.
Hadien ba la kheiñ bha ba pynbeit ka bill kaba poi shaduh ka 20000, 24000 hajar tam ka la poi noh tang 4000 ne 5000. Kumta na ka liang ki longkmie jong katei ka shnong, ki la ong ba lada ym dei na ki nongïalam ka HYC, ki la duh ïa ka bording bad ki la kit ram da ki phew hajar.
“Ngi kitbok ba ka HYC kan nang kiew shaphrang, ka jingïakynduh ïa ki Nongïalam ka HYC long kumba phah ïakynduh u Blei ïa ngi ban ïarap ïa ngi kiba duk”, ong ka kong S.Wahlang kawei na ki longkmie.
