Shillong, Naiwieng 11: Ha kaba ïadei bad ka jingkhlad noh jong u shipai Khasi ha ka jingïakhun thma na ka liang ka Mahila Pradesh Congress Committee, Meghalaya ka la phah ïa ka khubor sngewlem sha ki bahaïing bahasem bad ruh sha ki paralok parajor jong u Aibok Madur (Bam Kwai ha Dwar U Blei) uba dei u nongshong shnong ha Mawbri, Ribhoi distrik.
“U shipai Aibok u dei uba lah aiti met bad la mynsiem ha ka jingïaleh ka jingïakhun tyngeh bad ki lehnoh ha ka thaiñ Saichen ha Jammu Kashmir myn ha ka 7 tarik u Naiwieng, ha kaba u lah aiti ïalade na ka bynta ka Ri. Ka long kaei kaei kaba sngewsih ban leit duh ïa la u khun ka ïing bad ka long ruh kumjuh ka burom ba u shipai Aibok la pynsah ka nam ryngkat bad ka kyrteng ha kane ka Rilum Khasi ka Jylla jong ngi,” la pynpaw ka MPCC ha ka kyrwoh khubor.
Ka la ong ba na liang ka seng Congress ka phah ïa kane ki khubor sngewlem bad kumjuh ruh ka ai mynsiem lyngba ki jingdwai ïa ka longïing longsem jong u Aibok Madur ba U Blei un don ryngkat bad ki.
