Shillong, Naiwieng 11: Ka President jong ka ri India ka Droupadi Murmu ha ka sngi Nyngkong ka la pynsmai ïa u Justice Sanjiv Khanna kum u Chief Justice ka Supreme Court ka Ri India, ha kaba ïa kane ka jingpynsmai la pynlong ha Ganatantra Mandap, Rashtrapati Bhavan New Delhi.
U Justice Sanjiv Khanna u la shim ïa ka jingbam smai hakhmat ka President jong ka Ri India, ha kane ka sngi la sakhi lang da u Myntri Rangbah duh jong ka Ri India u Narendra Modi, la donlang u Vice President ka Ri India u Jagdeep Dhankhar bad kiwei ki heh ka sorkar pdeng.
Ïa u ne nongbishar ba Rangbah duh ka Supreme Court u Justice Sanjiv Khanna la kha ïa u ha u snem 1960 bad u la ai kyrteng bad ka Bar Council ka Ri India kum muktiar ha u snem 1983 bad la sdang ïa kam ha District Court ha TisHazari Complex Delhi.
U la trei kum u muktiar bad u la kiew ha ki kam bishar ha ki kyrdan bapher bapher bad dei ha ka 18 tarik u Kyllalyngkot, 2019 la kyntiew kyrdan ïa u kum u nongbishar ka Supreme Court bad mynta ka sngi la pynsmai ïa u kum u nongbishar ba rangbah duh jong ka Supreme Court bad un shong thait na ka kam ha ka 13 tarik u Jymmang, 2025.
