Sngewkmen ka Myntri ban ïoh long MLA/MP haduh 33 persen ki longkmie

Shillong, Nailur 19 : Ka Myntri ka Koit ka Khiah, Kong Ampareen Lyngdoh ha ka sngi Ba-ar ka la pynpaw ïa ka jingkmen halor ka jingwanrah ïa ka Women Reservation Bill kaba mang 33 persen ka bhah ïa ki longkmie ban long ki nongmihkhmat ha Parliament kumjuh ruh ha ki Iing Dorbar Thawain ha ki jylla bapher bapher ha ka Ri.
Haba kren bad ki lad pathai khubor, ka Myntri ka la pynpaw ruh ïa ka jingkyrmen ba katei ka Bill kan wan dur bad kan sa long ain noh ha kaba ki ïing Dorbar Thawaiñ kin don lang ïa ki longkmie kiban shim bynta ha ka saiñpyrthei.
“Haba phi mang kyrpang kano kano ka seat ïa ki kynthei, nga tharai kata kan dei ka lynti kaba kyrpang ban ai ka jingithuh. Ki dei hok ban ïoh. Lada don ne ym don kyrtong, nga tharai kin don beit ki riew don sap ha ka jylla Meghalaya,” ka la ong.
Shuh shuh ka la ong ruh ba ka jylla ka don ïa ki longkmie kiba trei borbah ha ki bun ki jait kam. Kumta, ka ong ba ka khmih lynti ban pyntreikam pura noh ïa katei ka Bill. “Watla sniewbok kin don ki jaka ba ki rangbah kin hap ai lad noh ïa ki longkmie bad kata kadei kaei kaei kaba paka tam eh kaba ngi leh naka bynta ka Ri,”ka la bynrap biang.
Ha kajuh ka ong ruh ba ki longkmie ka jylla ki la long kiba la pynkhreh ban aireng ha ki lympung saiñpyrthei, da kaba kob artad ba ka jingjop jong ki rangbah ruh kadei da ka jingkyrshan ki longkmie.
Ha kajuh ka por u Myntri Rangbah, Conrad Sangma u la pdiang sngewbha ïa ka rai jong ka sorkar pdeng ban mang ïa ka bhah kaba 33 persen na ka bynta ki longkmie ha Parliament kumjuh ruh ha ki Iing Dorbar Thawain ka jylla ban long ki nongmihkhmat.
Haba kren bad ki lad pathai khubor, u Conrad u la ong, “Kumba ka jylla kadei kaba ai jait sha ka Kmie bad kum u briew u ba ngeit ha ka jingpynkup bor ïa ki kynthei, nga dap da ka jingkmen kaba khraw halor kane ka Bill bad nga pdiang sngewbha ïa kane namar nga tikna ba kane kan ïarap ban pynkhlaiñ shuh shuh ha ka jingpynkhlaiñ ïa ka jingmih jong ki longkmie shakhmat ha ka Parliament kumjuh ha ki Iing Dorbar Thawain ha ki jylla.
Shuh shuh u ong ruh ba kum ka jylla u ngeit ba kin pdiang ïa kane kane namar kadei kawei na ki khyndiat tylli ki jylla ha ka ri kaba ngeit ban pynkup bor ïa ki longkmie ha ka imlang sahlang da kaba ai jait sha ka Kmie kaba long shi bynta jong ka kolshor.
Da kaba pyntip ba ka party jong u, ka National People’s Party (NPP) kan sa shim rai halor kane ka bynta, u Conrad u la ong ruh ba kum ka party shen kin sa khot ïa ka jingïalang.