Nongstoiñ, Nailur, 19: U Deputy Commissioner ka West Khasi Hills u Bah Garod LSN Dykes ha ka sngi Ba-ar, u la pyntip ba ki bor synshar District ki la thung da ka Judicial Inquiry ban tohkit ïa ka jingduh noh ka longkmie ïa i khunlung ba dang shu kha namar ka jingkah lynti ïaid jong ki rawon ba ïakop khwai dohkha ha pung Pamphyrngai, kaba jia ha ka sngi Saitjaiñ jong ka taïew ba ladep.
U Bah Dykes u la pyntip ba u Superintendent of Police jong ka District, u la ujor suo moto case halor kane ka jingjia bad ka jingtohkit mynta ka la ïaid shakhmat.
Kane ka rai ka la mih na ka jingïalang hapdeng jong u DC, u Superintendent of Police, bad ki Magistrate ba long ha ka sngi Ba-ar.
Ha ka jingïakren bad ki lad pathai khubor, u Bah Dykes u la ong ruh ba ka jingïalang ka la shim ruh ïa ka rai ban pynduh noh ïa baroh ki jingai jingbit jong ka Khasi Hills Autonomous District Council (KHADC) ban pynlong ïa ka jingïakop khwai dohkha ha West Khasi Hills hadien ba ka tnad District Council Affairs (DCA) ka Sorkar Jylla, ka la pynmih ia ka hukum ban pynduh noh ïa ka jingpynbna jong ka KHADC No DC/RBF/XXXII/64/2023/171 ba 14 tarik Naitung 2023, kaba ïadei bad ka jingkhmih bad jingteh kyndon ïa ki jingïakop khwai dohkha.
Ïa kane ka jingpynbna la pynmih ruh ha ka Part-II jong ka Gazette ka Meghalaya ha ka 3 tarik Nailar 2023.
Katkum ka hukum ba la pynmih na ka DCA, la ong ba u Lat ka Jylla u la lap ba ka KHADC kam shym la ïaid katkum ki lynti kiba dei ha ka jingpynmih ïa kane ka jingpynbna ha ka Gazette ka Meghalaya.
Haba kylli, u Deputy Commissioner u la pyntip ba ki nongpynlong ïa ka jingïakop khwai bad kumjuh ruh ki nongïalam shnong ka Ksehkohlong, ki la wan mih sha ka ophis jong u bad pyntip ba u ladep kren shai ba ïa kaei kaba la jia, ka kam kan ïaid shakhmat bad ka aiñ kan sa leh ïa kaba donkam.
