Ïatai ka ïingdorbar Thawaiñ da ka jingsngewkhia ïa ka jingjyllei u drok

Shillong, Nailur 19: U Dr Mukul Sangma, Myntri Rangbah barim, u la maham ïa ki Nongmihkhmat paidbah naduh ki Myntri, MLA ba kin husiar bha ïa ka jingïadei paralok badno badno, ïoh ba ka jia kumba jia ïa u Myntri Rangbah u Conrad Sangma, uba la ïashon dur bad uwei u khun jong u MLA barim ka Mizoram bad une u khun jong u MLA barim hadien la lap ba udei uwei na ki nongkhaïi drok rangbah ne u “Kingpin” jong ki nongkhaïi drok., ïa kaba la pynmih ruh ha ki lad pathai khubor ha nongbah Delhi.
U Dr.Mukul u ong ïa kane ka ha ïingdorbar Thawaiñ ka jylla mynta ka sngi haba ïashim bynta ha ka Motion ba la wanrah da u MLA ka Nongkrem, u Bah Ardent Miller Basaïawmoit halor ka jingjyllei u drok ka jylla.
“Ngi dei ban long kiba husiar, namar ym lah ban tip kine ki lah ban shong lang da ki kali kiba don ki Pulit pahara kiba biang”, la ong u MLA ka TMC.
U la ai jingmut ruh ba ka la dei ka por ba ki kmie ki kpa kin peit bad sumar bha ïa la ki jong ki khun ki kti shano ki leit, badno ki ïa long paralok khnang ban lait na ki jingsniew jong u drok.
Ha shuwa jong kane,u Bah Ardent haba wanrah ïa kane ka Motion, u la pynpaw ka jingsngewkhia ïa ka jingjyllei u drok ha ka jylla kaba la ktah shibun ïa ki khun Samla bad kumjuh ruh ïa ka imlang sahlang ha kine ki sngi ba mynta. U Bah Ardent u la ai jingmut ba ka sorkar kadei ban kham pyrkhing shuh shuh ïa ka aiñ bad ban buh ruh da ka kuna kaba kham heh khnang ba kito kiba ju mlien ha kine ki jait kam kin pei shkor. Ha kajuh ka por u Bah Ardent u la ong ba ka sorkar kadei ban buh bun ki jaka ïasyllok ïa ki briew ba ngat ha ki jingdih drok ne ki ki De-addiction Centre, namar ki jaka sumar jong ki Private ne ba la buh ki riewshimet ki remdor palat bad ki briew baduk kim kotbor ban phah sumar ha kiba kum kine bad donkam ban buh da ka sorkar.
Ïa kane ka Motion la kyrshan ruh da u Bah Charles Marngar, MLA ka Mawhati, uba la pynpaw ka jingsngewkhia ïa ki jingjia ha kine ki sngi tang ka daw jong u drok, ha kaba ka la jyllei sa ka tuh ka thiem bad kiwei kiwei de ki kam sniew. U Bah Charles u la ai jingmut ban thaw da ki Komiti bapher bapher khnang ban lah ban ïaleh pyrshah ïa kane ka jingsniew. U Bah Gabriel Wahlang, MLA ka Nongstoiñ, haba kyrshan ïa ka Motion, u la ong ba ka daw jong ka jingngop ki Samla ha ka jingdih drok, kadei namar ka jingbymïohkam ïoh jam, ka jingbymtip bad sngewthuh bha ïaka jingsniew na u drok ha kaba ki shu ïa bud tynneng ïa ki paralok, nangtga ka jingbym skhem ki longïing longsem, ka jingnoh mynsiem bad kiwei. U la ai jingmut ba ka sorkar kadei ban pynjur ïa i awareness programme bad khamtam eh ban seng kam seng jam, khnang ba ki samla kin lait na kine ki jingdih ba sniew.
U Bah Adelbert Nongrum, MLA North Shillong u la ïathuh ïa ka jingbym shngaiñ ka ïaid ka ïeng jong ki paidbah, ha kaba ki nongkhaïi drok ki ap ha ki lynti ki syngkien tang kumno ban ïoh tuh bad lute ban ïoh pisa ban thied drok.