Sngewkhia u MLA ba pynslem ban ker bad tei ïa ka ïing ophis Patharkhmah Civil Sub Division

Shillong, Nailur 19 : U MLA ka Congress na Umsning u Dr Celestine Lyngdoh ha ka sngi Ba-ar, ula pynpaw ïa ka jingsngewkhia halor ka jingpynslem ïa ka jingker bad ka jingtei ïa ka ïing Ophis jong ka Patharkhmah Civil Sub-Division.
Haba wanrah ïa kane ka mat hapoh ka kynta kylli jingkylli ha ïing Dorbar Thaw Aiñ, u Dr Celestine ula ong ba ïa ka jaka la ai sngewbha sha ka Sorkar ha ka por ba ka Patharkhmah ka dang dei tang ka Administrative Unit. Hynrei wat hadien 15 snem ba la lah, ym pat don uwei ruh u paia ba la pynïeng da ka Sorkar Jylla.
“Namar kane, ka la don ka jingkyntur pud bad ka jaka ba la ai sngewbha sha ka Sorkar kala nang rit nang rit katba dang ïaid ki sngi” ula ong haba kyntu ïa ka Sorkar ban pynïeng paia noh lada kam pat lah ban ker noh kham kloi ïa ka jaka ruh.
Kat kum ka jingong jong u ki Ohisar ki la leit treikam tang arsien ha ka shitaiew.
“Namar kata, ngi kyrpad ïa ka Sorkar ban pynthikna ha ka ban tei noh kham kloi ïa ki jingker bad ïa ka ïing ophis na ka bynta ka Civil Sub Division” ula ong.
Haba jubab, u Myntri ka Tnad General Administration Rakkam A Sangma ula ïathuh ba 11.864 acre ka jaka la ai sngewbha sha ka Sorkar ban tei ïa ka iing ophis jong ka Civil Sub Division bad pyntip ba ïa mynta kane ka Sub Division ka dang treikam shipor na ka Ophis u SDO, PHE.
“Ka Tnad ka la shim mynta ïa ka sienjam ban tei noh ïa ka iing ophis ba shirta lem bad ka jingker” ula bynrap.