Dawa tohkit ka KHNAM ia u Conrad ba kynnoh donkti bad u nongkhaii drok ba shyrkhei tam

Shillong, Nailur 19 : Ka Khun Hynniewtrep National Awakening Movement (KHNAM) mynta ka Sngi Ba Ar ka la dawa ba dei ban tohkit ïa u Myntri Rangbah ka jylla u Conrad K Sangma halor ka jingkynnoh u Dr Mukul Myntri Rangbah ba rim ka jylla hapoh ka ïing Dorbar Thawaiñ mynta ka sngi ba u ïadonkti bad u nongkhaïi drok ba shyrkhei tam na Mizoram. Ka jingkynnoh ka la mih hadien ba u Dr Mukul u la ïoh ïa kawei ka dur ba u Conrad, ka kurim jongu ki ïashon dur lang ha kawei ka jingïalang ba heh ha nongbah Delhi da kaba ki ïashong lang ha kajuh ka miej.
U Dr Mukul u la sei ïa ka dur u Conrd bad ka kurim jongu lyngba ka Mobile phone ba ki ïashon dur lang bad u Henry Lalremsanga u nongkhaïi drok ba shyrkhei uba la shah kem ha ka 23 tarik Iaiong 2023 bad ïoh ban kurup ïa u drok ba shongdor hynriew klur tyngka uba dei u kuli ba la khang ban die u Pseudoephedrine.
Kane ka jingsei madan mynta ka sngi hapoh ka ïing dorbar halor kane ka jingïadei u Myntri Rangbah bad une u nongkhaïi drok ka la buh u dak jingkylli ba khraw bad kat kum ka aiñ ïa u Myntri Rangbah ruh dei ban tohkit na ka bynta ka bha ka miat ki paidbah ka jylla, ong ka kyrwoh ba la phah da u Working President ka KHNAM u bah Thomas Passah.
Shuh shuh ka KHNAM ka dawa ruh ba ïa u drok ba la ïoh kurup da ki pulit ka jylla dei ban thang ne pynjot pynpra hakhmat ki nongthoh khubor khnang ban lait na kino kino ki jingsngew artatien.
U la ong kawei kaba ki paidbah ki buh jingkylli bha ka long halor ka rukom bret ne pynjulor ïa u drok ba la ïoh ban kurup hapoh ka jylla.
U la ong kat kum ka Narcotic and Psychotropic Substance Act 1985 jong ka sorkar pdeng bad kat kum ka Section 52A ka la kdew shai halor ka jingpynjulor bad bret ïa u drok ba la ïoh ban kurup bad kat kum ka subsection 2,3 bad 4 jongkatei ka section la kdew ruh kumno ka rukom dei ban leh haba bret, pynjulor bad thang ïa u drok ban lait ka jingshah ktah ka mariang, ne ioh don kiba tuh bad pyndonkam biang bad bad kumta ter ter.
Ban pynthikna ban lah ban rat dyngkong ïa u drok na kane ka jylla ka sorkar ka donkam ban ïatrei lang bad ki paidbah bad na ka bynta kata ka sorkar ka donkam ban ïoh ka jingshaniah na ki paidbah. Na kata ka daw ka KHNAM ka ai jingmut kumno ban bret, ne pynjulor ïa u drok kat kum ki kyndon aiñ bad ban leh ruh hakhmat ki lad pathai khubor.