Ka jingkynnoh u Dr Mukul ka long ka bym don nongrim bad kaba kam kai khait : Conrad
Shillong, Nailur 19 : U Myntri Rangbah ka Jylla Conrad K Sangma ha ka sngi Ba-ar, ula ñiew ïa ka jingkynnoh u Myntri Rangbah barim u Dr Mukul Sangma lyngba ka dur ba u (Conrad) don jingïadei bad u briew uba shah kem kum u nongkhaïi drok ba shyrkhei ha ka jingïoh kurup ïa u droks ba hynriew klur tyngka ha Mizoram, kum ka kam ba kam kai khait bad ka bym don nongrim satia.
U Dr Mukul ula kynnoh ba u Myntri Rangbah u don ka jingïadei ba ïajan bha bad une u nongkhaïi droks na Mizoram haba pyni ruh ïa ka dur u Conrad , ka kurim bad u Henry Lalremsanga ba ki iashon lang ha kawei ka jingïalang ba heh ha Delhi.
Kane ka jingkynnoh ka la mih hapoh ka ïing Dorbar Thaw Aiñ ha ka por ba ïatai ïa ka motion halor ka jingkynrei u droks hapoh ka Jylla.
“Ka long kaba sngewsih ba u briew ha ka kyrdan jong u (Mukul) ban wanrah ïa ka dur bad shu shim rai ïa kaei kaei baroh. Ban pynïadei ïa ki briew tang na ka dur ki arngut ki briew ba shu ïashondur lang, nga sngew ha ka pyrthei mynta, ka dei ka kam ba kam kai ban pynshisha ïa kano kano ka jingkynnoh. Ta ka daw ngam don eiei ban kynthoh ïa kane” ong u Conrad haba ïakren bad ki nongthoh khubor.
Haba pynpaw ba u la shondur bad ki million ngut ki briew kum u nongmih khmat paidbah, u Conrad ula ong “Nga ïakynduh bad nga ïashong khana bad nga ïashondur bad ki million ngut ki briew. Wat haba nga ïaid ha ki surok, ki don ki briew ba pynsangeh ïa nga, ngam ju ong em, namar ngi dei ki nongmih khmat paidbah”.
“Nga sngew ban pyndon jingïadei ïa ki kam jong arngut ki briew tang namar ka dur bad ban shu rai kut noh, nga sngew ba ka dei ka kam ka bym shongnia ïano ïano ruh ban shu leh kumta” ong u Conrad haba bynrap “Kan hap ban don ki sakhi ki satar ïa kiei ki kam kiba la jia. Kaba nyngkong hi, ngam don jingtip eiei ruh em, kiei kita ki kam ba u leh bad nga ithuh ïa bun ngut ki briew kiba don ha katei ka jaka bad kum u nongïalam paidbah ngi hap ban ïakren bad baroh ki briew”.
“Hato ka kyrteng u Conrad ka mih ha kano kano ka mukotduma ha ïing bishar ne ha ka police case?. Nga sngew ba kane ka dei ka jingkylli ba donkam bha. La ngi la shah khot ïakren lane don kano kano ka case ba la ujor pyrshah ïa ngi, nga sngew ba kine ki dei ki nongrim kiba dei ban kynthoh kum u briew uba la don ïa ka kyrdan” ula bynrap.
Haba kylli, u Myntri Rangbah ula ong ba un sa leh eiei halor kane ka kam kat kum ki rule bad ki kyndon kiba don hapoh ka ïing Dorbar Thaw Aiñ.