Sngewkhia u Bah Sawkmie halor ka Roster System, kwah ban lum ka Sorkar ïa baroh ki MLA

Shillong, Iaiong 9 : U MLA ba rim jongka Mawlai Constituency u bah P.T Sawkmie u la pynpaw ka jingsngewkhia jur halor ka Roster System jongka Reservation Policy bad halor kane u la ong ka sorkar ka dei ban da bishar sani bha shwa ban shim ia ka rai da kaba ka dei ban khot lang ïa baroh ki MLA, ki Seng Bhalang, ki Riew Pawkhmat bad baroh kiba ïadon bynta ban ïamir ïatai sani bha shwa ban shim ïa ka rai kaba lah ban pdiang bad mynjur lang da baroh.
Haba ïakren bad u nongthoh khubor u la ong “ Ka Reservation Policy ne ka bhah thung kam thung jam ka dei ban bteng ha ka jylla hynrei dei ban bishar bniah bad kiba dei ban ïoh bun ki dei ki jaidbynriew kiba bun paid ha ka jylla namar kata ka daw donkam ban bishar bniah biang ïa ka kumba la buh kyndon ba dei ban bishar ïa kane ka polisi na ka por sha ka por lane shisien man la ka shiphew snem”.
U la ong shuh shuh hooid kane ka mat ka long kaba eh bha ban shim rai mar mar namar lada bakla kan ktah bha ïa ka jingsngew ki paid nongshong shnong jongka jylla hynrei u la ong ba u kyrmen skhem ba ka jingstad jongka sorkar kan paw da kaba kan ïamir jingmut bha bad baroh ki liang shwa ban shim ïa ka rai kaba khatduh ka ban ym ktah ïano ïano ruh bad ka ban pdiang bad mynjur lang da kiwei.
U la ong ruh kumba ka ïing bishar High Court ka la pynpaw ruh ba ka dei ka ïing Dorbar Thawaiñ bad ka Sorkar kiba dei ban ïatai sani bad shim rai halor u snem ban pyntreikam ïa ka Roster System kumta ruh ka dei ka jingstad jongka sorkar kumno ban leh ïa kane ka kam kaba kongsan tam bad kaba dawa ban pynbeit noh mar mar.