Kan long ka jinglehraiñ lada hap wan ki bor pahara nabar ban khang khaïi dewïong be-aiñ

By Mawphor News Desk On Apr 10, 2023

Shillong, Ïaïong 09: Ka United Democratic Party (UDP) ka la pynpaw ba ka la long ka jinglehraiñ kaba khraw ïa ka jylla ba da ki bor pahara kiba na bar jylla kin hap wan hap pahara ban tehlakam ïa ki kam sahlan be-aiñ ïa u dewïong.
“Ban wan buh da ki pyrton pahara ha ka jylla na shabar ban teh lakam ïa ka kam shalan be-aiñ ïa u dewïong ka pyni sha ka pyrthei ba ngim pat kotbor satia kum ka jylla ban leh hi ïa kane ka bynta,” ong u General Secretary ka UDP u Dr Jemino Mawthoh.
“Kaba donkam ka long ba ngi dei ban pyndonkam da ki bor pahara jong ka jylla jong ngi ban pyndep ïa kane ka kam hynrei kane ka jingwan kiba na bar ka pyni ba ka sorkar jylla ka tlot haduh katta katta ban leh ïa kane ka bynta,” ong u Dr Jemino haba kren ha kaba ïadei bad ka jingdonkam ba ka sorkar jylla ka dei ban leh tyngeh ïa ki kam be-aiñ ha ka jylla.
Kane ka jingkren jong u Dr Jemino ka long hadien ba ka Meghalaya High Court ka la hukum ba dei ban wanrah da ki pyrton pulit Central Industrial Security Force (CISF) na bynta ban tehlakam ïa ka jingshalan be-aiñ ïa u dewïong ha ka jylla.
“Haba ngi synshar ïa ka jylla ngi dei ban synshar bha ym ban ai mon kat ïa kino kino ki kam ba be-aiñ kiba kwah ban leh. Ngi donkam ban bat ïa ka aiñ bad ban leh ruh katkum ka aiñ hynrei lada ym kumta kan don ka jingkulmar ha ka jylla hi baroh kawei,” u la ong.
Shuh shuh u la ong ba jin lada ki bor ba dei peit jong ka jylla ki pyndep hok la ka kamram kumba ki dei ba leh kan ym donkam satia ïa ki bor pahara kiba na bar ban wan ai jingpahra bad kam donkam hi ruh ïa ka kshari ban tuklar ïa kane ka kam.
Haba kylli ïa ka nongrim kaba ka UDP halor kane, “Ngi kum ka party ngi la pynpaw ïa ka jingsngew pyrshah ïa ki kam be-aiñ ha ka jylla bad na ka liang ki MLA ka party ruh ki la kren pyrshah bha ïa kane ka mat khaïi tuh ïa u dewïong bad ki la kren ha kaba shai ba da leilei yn ym lah ban pdiang ïa ki kam be-aiñ,” u la ong.
U la ong ruh ba ka party kan bteng ïa ka jingkren pyrshah ïa ki kam be-aiñ namar lada ailad kan long ka jinglehraiñ ynda ki bor ba na bar kin hap wan ban pyndep ïa ki bynta ba dei hok jong ka sorkar jylla ‘bad lada ka jia kumta kan dei ka jinglehraiñ ïa ka jylla bad kan pyni ïa ka jingtlot ka sorkar,’ ong u Dr Jemino.