Nongpoh, Jylliew, 23: Ka Durbar Raid Nongpoh ha ka sngi Thohdieng ka taiew baladep ka la lum da ka jingïalang ha iing Durbar jong ka Raid Nongpoh ban mih shakhmat ban pynshai biang halor ka jingkren jong u Arpit Upadhyaya Deputy Commissioner ka Ri-Bhoi District kumba la mih ha ki lad pathai khubor ha ka 25 tarik u bnai Jymmang 2024 ka dei hadien ba la ioh pdiang ïa ka jingujor na ka Nongpoh Town Committee ba ka Raid Nongpoh ka la kam ïa katei ka jaka ba la tei ïa ka jaka pynieng kali paidbah.
Kumba la pynpaw da u DC ka Ri-bhoi dang shen sha ki lad pathai khubor, ka Raid Nongpoh ka la dep ban ai ïa katei ka jaka (Gifted) bad la dep ruh ban siew ïa ka bai lutksan kaba T. 10000 ha u snem 2000, ym tang katta, ka sorkar ka la dep ruh ban siew ïa ka bai lutksan ka jaka ha u snem 2006 kaba dei hadien ka jingpynheh ïa ka surok four-lane.
Haba kren sha ki lad pathai khubor na ka liang u Bah Linus Lyngdoh, Lyngdoh Raid ka Raid Nongpoh u la ong ba hadien katei ka jingpynshai jong u DC na ka liang ka Durbar Raid ka la leit kynduh bad pan ïa ka jingthoh, katkum ka jingkren jong u, hynrei haduh mynta ki khlem ioh.
Ha katei ka jingpynshai jong u DC u la ong ba ka jaka kaba don ha khmat ka MUDA Shopping Complex kadei kaba la long trai da ka Nongpoh Town Committee, kane ka la pynlyngngoh ïa ka Raid ba kumno kat u DC un shu kren khlem da tip ïa ka jingshisha nalor ba u la kubur ba ki don ki kot ban pynshisha. Hynrei ka jingshisha ka long bad baroh ngi tip ba ka Raid Nongpoh kam shym la ai ïa ka Nongpoh Town Committe hynrei la ai sngewbha sha ka Urban Affairs Department lyngba ka DC, Ri-bhoi ka kong Celestina Lamin khlem ka jingsiew eiei ruh em ryngkat bad ka jingmynjur. (Gift Deed, Dt. 5th Nohprah 2000).
Ha kane ka kot Gift Deed, ka area jong ka jaka ba ai ka Raid sha ka Urban Affairs Department ka long 4,960 Sq. Meters, bad ïa katei ka jaka la ai sngewbha na ka bynta ka jingbit jingbiang jong ki paidbah bad ka la don ruh ka jingkular na ka tnad Urban kaba ong ba hadien ba la dep ban tei ïa katei ka ïew, ïa ka building yn aiti sha ka Market Committee ba kynthup ïa kine ki nongkitkam harum Bah P. Syngkli (Chairman), B. Lyngdoh (Vice Chairman), O.P Lyngdoh (Secretary), B.Lamare (Asst. Secy/ Treasurer) baroh ki Rangbah Shnong kiba don ha ka sor Nongpoh, bad baroh ki Longsan jong ka Raid Nongpoh kin long ki dkhot.
U la ong ruh ba kum ka Raid, ngi dap da ka jingsngewkhia namar ba la don ka jingkynnoh na kiba bun ba ka Raid Nongpoh ka la dep die ïa katei ka jaka sha ka tand Urban Affairs Department ha ka dor T. 10,000/- kane kadei namar ba ka la don ka jingsiew bai lutksan sha ki lai bynta katkum ka consolidate voucher (13 tarik Nailur, 2007). Kita ki jingsiew ki long sha u Manoj Kumar Singh – la siew Rs. 10, 66,341/-, N.L. Pradhan – la siew Rs. 9, 76,517/- bad u Philson Syngkli, Secretary Raid Nongpoh – la siew Rs. 10,000/-.
Shuh shuh katkum ka shithi ba la phah sha ka ophis u DC sha u Director ka tnad Urban ha ka 3 tarik Kyllalyngkot 2008 la pynbna ba kitei ki 3 ngut ki dei ki trai jong katei ka jaka kaba mut ban shna ïa ka Shopping Complex bad la siew bai lutksan ïa ki, hynrei ka jingkylli ka long ba kumno ïa u Manoj Kumar Sing bad u N.L. Pradhan la pynlong trai ïa ki bad ki ioh ïa ka jingsiew kaba heh, hynrei ha ka Gift Deed pat ka pyni ba dei ka Raid kaba ai sngewbha khlem ka jingsiew sha ka Urban Affairs Department, khamtam ha ka Gift Deed la ïathuh shai ba kitei arngut ki dei kiba shong ha ka jaka rung jong katei ka jaka ba mut shna Shopping Complex bad kaba la hap ruh ha ka jaka sorkar ne Government land (P.W.D), wat la katta ruh ki la ioh ka jingsiew bun shah ban ïa ka Raid.
Ka jingioh ka Raid ïa ka pisa Rs. 10, 000/- ha ka kyrteng jong ka compensation ka long kum ka kam thok namar ba ha ka por ba ki wan ban ai kim shym la ong ba kadei ka ka jingsiew bai jaka (kumba la kynnoh) hynrei la shu wan sop sop ha ka por ba i Bah Philson Syngkli ba long ruh u Secretary Raid ha katei ka por, u don hapdeng ka jingthiah pang bad la shu phah sign khlem da pynshai ïa ka jingthmu bad ki ong ba kadei ka jingai sngewbha namar ba i don hapdeng ka jingpang.
Haba ioh ban ïakren bad u Bah Philson Syngkli ba dei ruh u secretary Raid ha ki por ba mynshuwa u la pynshai um shym dei ma u ba die ïa katei ka jaka bad um lah ban die marwei, bad kato ka jaka ka dei kaba don bynta lang da ki briew jong ka Raid bad ka jingsoi jong u ha kato ka por ka dei hadien ba wan uwei u majistor u ba la wan ban ong ba ka Raid ka la jop ïa ka mukotduma halor katei ka jaka bad da ka jingkmen u la soi hapdeng ka jingthiah pang bad sei ruh ïa ka cheque kaba T.10 hajar bad u la kren shai ruh ba kadei tang ka jingai sngewbha bad kam don kano kano ka jingïadie ïathied ïa ka jaka.
Na ka liang u Lyngdoh Raid u la kren shai ruh ba ka Raid Nongpoh kam don kano kano ka jingpyrshah ïa ka roi ka par, hynrei ngi kmen haba don ba wan rah, tangba kam mut pat ba kita ki nongwanrah kin ong ba ym donkam shuh ban ïa sngewthuh jingmut lang ne pynbeit haba donkam la ka long bad ka Dorbar Shnong ne Durbar Raid.
Namar ba ka la don ka jingshah byrngem bad shah kren beiñ, wat da ki ktien sih ruh ïa ka Raid kumta ngim banse kyrpad sha ka tnad Urban Affairs ba kan pyrkhat ban burom ïa ka jingïateh soskular kaba la don ha ka Gift Deed, jong u snem 2000da kaba kren shai ruh ba kam dei ka jing kwah pisa ne pynthud ïa ka roi ka par bad ngim kwah kano kano ka jingkulmar ne ka jingïashun, hynrei ngi kwah ban don ka jingsngewthuh jingmut bad ka jingïatrei lang hadeng ka Raid, ki Dorbar Shnong, Seng Samla, Seng Longkmie, Committee bapher bapher bad ka Sorkar na ka bynta ka imlang sahlang bad ki paidbah baroh, u la bynrap.
